«Пасун кечыже» уржа-сорла тургымлан тӱҥалтышым ыштен

Тудын пашашкыже Башкортостан Вуйлык Радий Хабироват ушнен. Республикым вуйлатыше кундемыште уржа-сорла тургымлан тӱҥалтышым пуэн. «Тений пасулашке 4190 комбайн лектеш, тиде кодшийсе деч 80 комбайнлан шукырак. Ял озанлык техникым да оборудованийым налаш кучылтмо роскотын ужашыжым петырыме компенсаций шотышто пашанам ончыкыжат шуяш тӱҥалына. Кундемыште теният сай шурно лектышым поген налына манын ӱшанена», - увертарен тудо. Уржа-сорла тургымын лектышыже почеш республикыште эн сай механизатор-влакым суапландарыме нергенат ушештарен. 

«Пасун кечыже» семинар годым тыгак кундемысе эн тале механизатор-влак «Трактор-шоу» таҥасымаште усталыкыштым ончыктеныт. Мастарлык конкурсышто таҥасымашын икымше кечынже В. Тайсин (Абзелил район, 1-ше вер), В. Шамситдинов (Баймак район, 2-шо вер) да В. Петрожицкий (Дуван район, 3-шо вер) ойыртемалтыныт. Кокымшо кечын сеҥымаш тошкалтыш тыгерак радамлалтын: 1-ше вер - Мелеуз район гыч В. Романов, 2-шо вер - Бурай район гыч Р. Султанов, 3-шо вер - Дӧртыльӧ район гыч И. Хамидуллин. Кумшо кечынже 1-ше верыш Буздяк район гыч Т. Рахматуллин, 2-шо верыш Чишма район гыч А. Сайфутдинов, 3-шо верыш Альшей район гыч А. Имангулов лектыныт.