Тӱшка вий дене

Инициативный тӱшкамат сайленыт. Тушко Н.П. Хисматуллинам, Т.А. Минликаевым, Р.Т. Альмекеевым, И.Б. Альмекеевам, В.А. Мухаметзяновым, В.А. Галиным пуртеныт. Кугу пашам вуйлаташ Вадим Галинлан ӱшаненыт. 

4, 10 да 15 майыште кум субботникым эртареныт. Урсай, Пекул, Уял ял калык тошто клубым рончаш да вержым эрыкташ рӱжге лектын. Оласе-влак окса дене полшеныт. Калык деч погымо окса дене тракторлан соляркым, тросым, кочкыш-йӱышым да моло кӱлешым наледеныт. 

Кум кечыште кугу пашам шуктеныт, чумыр кумдыкым эрыктен шынденыт. Субботникыш пӧръеҥ-влак гына огыл, ӱдырамаш-влакат шукын лектыныт. Рончымо пырням да оҥа-влакым СВО-што улшо-влакын ешыштлан пулан шалатеныт. Паша эр гыч кас марте шуйнен. Чолга пенсионер С.И. Галина да район Советын депутатше Ю.П. Галина пашаеҥ-влакым тамле кочкыш дене сийленыт.  «Тазалыкем, вием, ӱнарем улмо годым уло кумылын полшем. Тиде мемнан тӱшка пашана», - манеш паша ветеран.

 «Субботникыш лекше чыла еҥлан кугу таум каласынем. Тарватыме пашана куштылго огыл ыле, но тӱшкан чылажымат сеҥаш лиеш. Тыгай ура чонан, мер пашаш ушнаш ямде еҥ-влак улмо куандарыде огеш керт.

Чылан вий пыштен тыршеныт, нунын коклаште Мухаметзяновмыт, Альмекеевмыт, Тансаринмыт, Тимиргалинмыт, Булатовмыт, Пархоменко, Хисматуллинмыт еш-влакым ойырен палемдыман. Шукын шке техникышт дене полшеныт. Тимур Минликаев УАЗ бортовой машинаж дене, Уял гыч Владимир Андреев, Урсай гыч Вадим Булатов, Мешер гыч Эдик Асмеев МТЗ-82 трактор дене шуко пашам шуктеныт. Пекшаул гыч Сергей Курмакаев МТЗ-82 да ДТ-75 гусеницан трактор дене кугу пушенге вож-влакым куклен луктеден», - манеш ял староста Вадим Галин.

Еҥ-влак, погынен, тошто клуб олмым эрыктен, мландыжым тӧрлен, трактор дене куралын-тырмален шынденыт. Ты вереш, мотор лийже манын, шудым ӱденыт. Ончыкыжо тушан Кугу Ачамланде сарыште вуйым пыштыше-влаклан обелискым шогалташ шонат.

Урсай ял калыкын чолгалыкшылан да чот тыршымыжлан куанаш гына кодеш. Мутат уке, корно дене эртен кайыше-влакат ялын сылнештмыжым ужын йывыртат.