«Айык ял» лӱмым сулен налнешт

- Олеся, конкурсышто кузе  участвоватлаш тӱҥалда?

-  Август мучаште калык дене погынымашым эртарышна да тиде мероприятийыште участвоватлаш кутырен келшышна. Тӱҥалтыште, конешне, неле ыле, нимом умылен огынал, манаш лиеш. Вара паша эркын каяш тӱҥале: эн ончыч калык коклаште уверым шарышна, мутланышна. Сентябрьыште кугу благотворительный концертым эртарышна, Кӧкыш ял гыч специальный военный операцийыште вуйым пыштыше Артём Биктимиров ден Денис Шараевлан шарнымаш оҥам почна. Тиддеч вара кугу гына концертым эртарышна. Тышке «Боевое братство» Всероссийский мер организацийын Башкирийысе пӧлкажым вуйлатыше Альберт Ниязович Шагимуратовым  ӱжынна ыле. 

Районышто эртыше чыла благотворительный концертлашке «Пеледыш» куштышо йоча коллектив дене ушненна. Мероприятийлам организоватлаш да эртараш мыланна районысо «Боевое братство» организаций полшен. Вуйлатышыже Сергей Валерьевич Гайнулинлан кугу тау. Янаул районысо Тошто Кудаш ялышке миенна - калыкым шке погымо опытна дене палдаренна. 

- Могай мероприятий поснак шарнымашеш кодын?

- Йоча коллектив дене Нефтекамск олашке миенна, «Октава» ОПК-ште лийынна, тыгак Николо-Берёзовка, Карманово селалаште эртыше благотворительный концертлашке ӱжыныт. Нефтекамск олаште тунемше студент-влак да «Пеледыш» йоча коллектив дене «Тазалык йолгорнышто» лийынна. Рвезе ден ӱдыр-шамыч уло кумылын тренажерлаште заниматлышт да, мемнан денат тыгай тренажер-влак лийыт гын, пеш сай ыле манын каласышт.

Ола покшелне «Нефтекамск» манын возымо мут воктене марла куштышна. Икманаш, йоча-влакын шыже каникулышт пайдалын эртыш.

Тыгак каникул жапыште Марий Мераҥ ялыште верланыше «Салют» йоча лагерьыште лийна, тушто каныше ӱдыр ден рвезе-влаклан концертым ончыктышна. Тиддеч посна тачысе кече марте ятыр мероприятий эртаралтеш. Тиде - скандинавла, ече дене коштмаш, шашке, шахмат, бильярд дене модмаш.

11 январьыште марий калыкын ик эн жаплыме Шорыкйол пайремжым эртарышна. Тышке калык ятыр погынен ыле.  

- Мероприятийлаште лийше эн чолга участник-влак нерген иктаж мутым каласет ала?

- Тӱҥ шотышто «Пеледыш» ден «Вис-вис» коллектив-влакын участникыштым палемдем.

- Шукерте огыл Артём ден Денислан лӱмдымӧ ече таҥасымашым эртарышда.

- Тышкат ял калык - изижат да кугыжат - чолган ушнен. Сеҥыше-влаклан пӧлекым Артёмын аваж ден шӱжарже кучыктышт. Тыгак ме СВО участник-влаклан кертмына семын полшен шогена. Лашкам пӱчкедена, шукерте огыл оксам погышна. Тышке ура чонан шуко еҥ - Уфа, Москва, Санкт-Петербург, Казань, Псков, Нефтекамск да моло регионлаште илыше Кӧкыш ялын шочшыжо-влак - ушненыт.

- Шуко еҥ Кӧкыш ял тиде конкурсышто сеҥа манын ӱшанен огыл да «Кӧкыш ял гыч могай айык ял» манын ойлен…

- Тыгай мут-влак мыланна, мӧҥгешла, руш манмыла, мотивацийым веле пуэныт. Тыгай шомаклам колмеке, поснак йоча-влак, ме кертына, ме садак сеҥена манын, пашалан пижыч.

- Уфашке, республикысе этапыш могай кумыл дене каеда?

- Республикысе этап марте эше ятыр пашам ыштыман. Кок тылзе жапыште шуко мероприятийым эртараш шонена. Мероприятийлаште мыняр шукырак еҥ участвоватла, тунар сайрак. Но шукыжо тидым огеш умыло. Вет ялыште илыше калыкат йогыланаш тӱҥалын. Шукышт вольыкым огыт ончо - яра жапыштым телефон да телевизор воктене шинчылтын эртарат, а тыгодым клубышто ятыр спорт секций пашам ышта. Кеч шахмат да шашке дене мод, кеч волейбол дене. Тыгак фитнес дене заниматлена. Пӧртыштӧ ӧрканен кийымеш, клубыш толза, спорт дене кылым кучыза.

- Олеся, мутланыметлан кугу тау. Республикысе этапыштат сеҥымашым гына тыланен кодам.