«Шӧртньӧ шыже»

Тушко Башкортостанын делегацийжат ий еда коштеш. Тений республикын стендыштыже пытартыш ийлаште могай кӱкшытыш шумым, кундемын брендше-влакым: башкир мӱйым, Белебейыште лукмо сырым, имне да ушкал шыл гыч ыштыме деликатес-влакым, вошткойшо омартам да молым - ончыктат. Тыгак «Ял кундемым комплексно вияҥдымаш» кугыжаныш программа почеш Чишма районышто чоҥаш палемдыме «Агроялын» макетшымат ужаш лиеш. БР Правительствын палемдымыж почеш, ты илыме комплексыште чумыржо 7200 кв.м кумдыкан 100 пӧрт лиеш. Проектын акше 850 млн теҥгеш шуэш.

Выставка кечылаште моло ийласе семынак изи бизнесым, кооперацийым вияҥдыме, вольыкым ончымо, кушкылым куштымо йодышламат каҥашат.