Шурным погат, кургым ямдылат

БР ял озанлык министр Ильшат Фазрахмановын мутшо почеш, 26 августлан 200 тӱжем гектар мландыште шурным тӱредыныт (чумыр кумдыкын 10 процентше). Пырчан да пырчан-отызан кушкылым 250 тӱжем утла гектарыште (шуктышаш планын 15 процентше) соленыт. Погымо шурнын чумыр кугытшо 670 тӱжем тонныш шуын (кокла шурно лектыш - гектарлан 28 центнер). 

Телылан кургым ямдылыме сомылат ворана, 465 тӱжем гектар мландыште 60 процентшым соленыт. Ял озанлык пашаеҥ-влак 28 августлан 1 миллион 85 тӱжем тонн сенажым (планын 97 процентше), 408 тӱжем тонн шудым (58 процент) ямдыленыт, 64 тӱжем тонн силосым (6 процент) оптеныт. Силосым кызытеш 18 районысо озанлыкыште ямдылат. Тудым Татышле районышто эн шуко - 31,4 тӱжем тонным - шапашленыт, увертара БР Ял озанлык министерство.