Корным шке вий дене тӧрленыт

«Ончыч калык дене погынымашым эртарышна. Оксам ялысе кажне еш деч погаш пунчалым лукна. Кертшыже тудым вигак пуэн, тораште илыше-влак переводым ыштеныт. Е. Асмаева ден А. Ильгузин вич тӱжем, О. Алтынбаева, А. Абхаликов, М. Исламов, В. Кунаккузин, Р. Шангареева кум тӱжем теҥге дене колтеныт. Поро пашаш чылаже 103 еҥ ушнен, 123 тӱжем теҥгем погымо. Тачысе кечын окса деч посна нимом ышташ ок лий, садлан кок тӱжем денат, ик тӱжем денат пуэныт. Чылаштлан кугу тау!» - куанен ойла депутат.

Тылзе утла шуйнышо йӱр Усола корным чылт пытарен. Тыште иктым шарныман: корно шке транспортан еҥлан гына огыл, молыланат кӱлеш. Уке гын шыже да шошо лавыра годым ялыш пураш ок лий. Лакан корным тӧрлаташ Усола гыч М. Атнашев шке машинаж дене, В. Атнагулов, В. Курманбаев, Шаран селаште илыше В. Алтынбаев ден А. Карманов, пошкудо Шалтык ял гыч Р. Габдрахманов, Р. Салимгареев, Биктыш гыч С. Курмакаев шке тракторышт дене полшеныт. Погрузчикым Шаран селасе «Водоканал» организаций гыч ӱжыныт. Кум кече жапыште рвезе-влак пасу гыч кӱан ошмам шупшыктеныт. Тудым ончыч Усола марте шоссеште лакылаш оптеныт. Вара уремыште шаланыше асфальт корныштат лаке-влакым тӧрленыт. Кольмым кучен, уремысе корным тӱзаташ ял калык рӱж лектын, нигӧ ӧрдыжеш кодын огыл.

Тиде бригада денак Шалтык эҥер гоч вончымо изи кӱварымат олмыкташ ышт мондо, вет тудын деч посна Озерный уремыш нигузе пураш ок лий. Эше кӱвар Михайловка ялыш да асфалт корныш лекташ вик корнылан шотлалтеш. Тиде кӱвар денак ялысе вольык олыкыш кӱтӱш коштеш. Ял староста В. Ташбулатов калык дене пашам ыштен, чылан полшеныт. 

Трактор да машина дене тыршыше пӧръеҥ-влакын пашаштым В. Алтынбаев вуйлатен. Неле пашам шуктышо-влаклан Альфия Халитяновна кечывал кочкышым кӱктен - тамле шылан шӱр да чай дене сийлен. Пашам тыге рӱжге ыштыше-влаклан куанаш гына кодеш. Усола калык, таза лийза! Умбакыжат пашада ушнен шогыжо!