ЯЛ ОЗАНЛЫК ЙОДЫШЫМ КАҤАШЕНЫТ

«Республикылан элысе ял озанлык министерство дене пырля пашам ыштымын значенийже кугу. Башкортостан эре агропромышленный регион лийын, мемнан дене яллаште 1,5 млн еҥ ила. Тидлан кӧра вуйлатыше-влакат тиде отрасльлан чыла шотыштат полшаш тыршат, - палдарен республика Вуйлык Радий Хабиров. - Тений шошо агам сайын эртарен колтышна. Кеҥеж йӱранрак лие гынат, агропромышленный комплексым план почеш уэмден толмылан кӧра сай шурно лектышым налына манын шонена. Российын Ял озанлык министерствыже полшымо дене пытартыш вич ийыште техникым уэмдаш 56 млрд теҥгем кучылтынна да 16 тӱжем техникым налынна. Ты роскотын ужашыжым пӧртылташ манын, республикат 8 млрд теҥгем ойырен». Тудо тыгак ял вер-шӧр-влак писын вияҥмым да ял озанлык продукцийым перерабатыватлыме завод-влакым уэмдымым палемден коден.

Оксана Лут республикыште агропромышленный комплексым вияҥдыме пашам кӱкшын аклен. «Башкортостан - элысе тӱҥ ял озанлык кундем-влак гыч иктыже. Те  сакырушменым, ӱйым пуышо кушкыл-влакым перерабатыватлыме секторым сайын вияҥдеда. Экспортлан колтымо ял озанлык сатун чотшо ден ассортиментше кушкыт. Тений регионын агропромышленный отрасльжылан 2,5 млрд теҥге федеральный полышым пуымо», - каласен Оксана Лут.

Вашлиймаште ял вер-шӧр-влакым комплексно вияҥдыме программын ончыкылыкшо нергенат кутыреныт. Ты проектым илышыш шыҥдараш тӱҥалме годсек Башкортостан 5,4 млрд теҥге федеральный оксам налын, палемден Оксана Лут.  

Мучашлан Башкортостанын Вуйлыкшо Радий Хабиров Российын ял озанлык министржым август мучаште - сентябрь тӱҥалтыште Уфа олан 450 ияш юбилейжым пайремлыме торжественный мероприятийлаш унала ӱжын. Ты жапыштак Уфаште «Шӧран эл» фестивальым, Россий Ял озанлык министерство дене пырля вольык ашныме шотышто совещанийым эртарат.