Куштат, погат, ужалат…

Ик кило киярлан 40 гыч 100 теҥге марте йодыт. Ик вуй чеснокым 30, килограммжым 300 теҥге дене ужалат. Ик кило у пареҥгым налаш 50 теҥге кӱлеш. Тыгак свежа ковыштам, кабачокым ужалыше-влакат улыт. Вич литран ведра шем шоптырлан 2000, майонез ведражлан 400 теҥге кӱлыт. Кум литран ведрасе йошкар шоптырым 700 теҥгелан налаш лиеш. Ик майонез ведра эҥыжлан 350 теҥгем йодыт. 

Июльысо йӱр деч вара чодыраште поҥго кушкаш тӱҥале. Лышташпоҥгым (рывыжвоҥгым) пазарыште вич литран ведражым 400-500 теҥге дене ужалат, тынарак пӱнчывоҥгылан 600-700 теҥгем йодыт. Ик аршаш матрушка шудым налаш 40-50 теҥге окса кӱлеш. Рывыжвоҥгым погаш заказым налше-влакат койыт. Нуно 10 литран ведра поҥгым погаш 600 теҥгем йодыт. Ял гыч кондымо лу чыве муным 120-130 теҥгелан налаш лиеш. Ик килограмм ушкал ӱйын акше - 700, тувыртышын - 200, пел литр ӱмбалын - 250 теҥге. Бройлер чыве шылын ик килограммже 350-370 теҥгем шога. Кум литран банке мӱйлан 2000 - 2200 теҥгем тӱлыман. Тыгак мончалан куэ выньыкым ыштен ужалат. Ик мужыр выньыклан 100 теҥге, тумо выньыклан 250-300 теҥге кӱлеш. 

Пакчасаскам, емыжым шке кушташ, чывым да вольыкым шке ончаш, чодыра емыжым, шудым, поҥгым, выньыкым пӱртӱс лоҥгаште погаш але пазар гыч ямдым налаш? Тидым кажне еҥ шке гына пала. Туге гынат кевыт гыч налме кочкыш-йӱышын тамже шке куштымо але пазар гыч налме свежа пакчасаскан, шӧр-торыкынлан садак огеш шу.