Шочмо верыште чонлан ласка

Лида Тимирьяновна кажне ийын шочмо ялышкыже унала толеш. Ава-ачажын суртышт шукертак петыралтын гынат, родо-шочшыжо-влак дене, Шаран селаште Асыльян изаж дене ила. Янахмат ялыш ачажын 95 ияш акаже Алтынчач Ибяева декат пурыде ок кай.

«Шочмо верыш толын, чон ласкалыкым налам, вий-куатым погем, кап-кыл куштылеммыла чучеш. Мый кеҥежым емыж шумо пагытлан толаш тыршем. Олыкыш, чодыраш кошташ йӧратем, мӧрым, снегым погем, пӱртӱс лоҥгаште канем. Кажне ийын могай-гынат шарнаш кодшо событий-влак лиедат. Ӱмаште пырля тунемме йолташ-влак дене вашлиймаш эртыш. Тений шуко еҥын юбилейышкыже мияш логале. «Кугымӧр кундем» фестиваль пеш келшыш. Йолташ-влак дене ужын ойласет гынат, чонлан куштылго лиеш», - манеш Лида.

Штукатур-малярлан ыштымылан кӧра тудо витле ияшак пенсийыш лектын, туге гынат яра ок шинче. Кызыт клининг компанийыште пашам ышта. «Москваште йокрокланаш, паша деч посна шинчаш жап уке: иктым ыштет, вара вес сомыллан пижат. Эр деч вара касат вашке шуэш, тыге ӱмырат эрта. Икымше январьыште изамын шочмо кечыже. Чыла сай лиеш гын, шочмо кундемышкем телымат унала толын каем», - ойла Лида Тимирьяновна.

Тудо кажне ийын пенсионер-влаклан темлыме «Московское долголетие» программа почеш путевка дене Шем теҥыз воктек канаш коштеш. Ӱмаште Евпаторийыште канен пӧртылын.