Шудым ямдылыме жап

Эх, тиде жапым шарнаш веле кодеш. Ончычсо семын чодыра коклаште верланыше аланыште шудым ямдылыше-влакат ындыжым укеат улыт.

Жап писын вашталтеш, тудын дене пырля шудым ыштыме тӱрлӧ ӱзгар-влакат вашталтыт. Илен-толын, калык «сава» мутымат монден кертеш.

Шаран районыштат, моло верласе семынак, шудым ямдылыме тургым умбакыже шуйна. Кызыт шудым шукыж годым трактор дене ротор косилке дене солыктат. Ялыштына шуко еҥын пай мландыже уло. Тиде мландыште калык вольыкым пукшаш шудым ӱда. 

Шудо тургым жапыште кече мучко пасушто трактор гӱжла. Еҥ-влакат шудо солыкташ трактор почеш черет дене шогат. Сай игече годым, вашкерак солен-поген налаш манын, фермер-влакымат комбайнышт дене полшаш йодыт. Южышт йӱдымат шудым рулоныш пӱтырат, ожсо гай нигӧ пасушто копнам ок ыштыл. Погат да тудо кечынак мӧҥгышкышт шупшыктат.

Чаманен каласыман, тӱкан шолдыра вольык ий еда шагалем толеш. Ончыч Акпарсыште гына ял калыкын кум кугу кӱтӱжӧ ыле гын, ынде 60 ушкал наре веле кодын. Тыгодымак шорык ден каза ешаралтыт, а кӱтӱм электрокӱтӱчӧ кӱта.