Келшен илымылан мо шужо

Пошкудыжо мӧҥгыштыжӧ ала-мом пеш кычалеш ыле. «Мом кычалат?» - Марина тургыжланен йодо. Настя йӱкын шортын колтышат, пелештыш: «Телефонын зарядникше ала-кушко йомын. Эргым шуко жап ыш звонитле, а таче тудын дене мутланен шым керт, «Украина» мутшым гына колын кодым, телефонем йӧрыш». Марина шкенжын зарядникшылан куржо. Адак тудыжо Настян телефонжылан келшыш. Ӱдырамаш куаныш, эргыж дене мутланен керте, чонжат лыпланыш. Эргыже, чынак, Украиныште. Ачаж дене ончычак мутланеныт улмаш. Миша армий деч вара пашам ыштен, эре сарыш каяш шонен коштын, но иктыланат ойлен огыл. «Эргым нерен шогышан огыл, тушманлан вуйжым ок пу», - кугешнен пелештыш Настя. 

Марина Настялан вольыкшым ужаташ полшыш. Тыгай годым воктене кӧ-гынат лийшаш. Нуно шуко мутланышт. Настялан Марина пелен моткочак куштылго лие. Коктын сарышке пӧлекым колташ шонен пыштышт. Ончыч ик мужыр дене пижым да носким пидаш каҥашышт, вара йолташыже-влакланат ямдылаш лийыч. Тыге кас еда пырля пӧлекым ямдылаш пижыч. Иктыже межым шӱдыра, весыже пидеш. Марина шӱдырен мошта. Школышто тунеммыж годымак Галина Аймурзиновна  труд урокышто межым шӱдыраш туныктен. Еҥын шӱдырымыжым ужын, Настят шӱдыраш тунеме. Тыге паша куштылеме. 

Настян марийже ончыч ватыжлан верч ойгырен кошто. Ӱдырамаш-влакын мутланен пашам ыштымыштым ужат, куанен колтыш. Петр шонаш тӱҥале: «Носки дене пырля эше мом колташ лиеш?» Вате-влакын пашашт утыр мучашыш шуэш. Ик кече, вӱдым ырыктен, носки ден пиж-влакым мушкыч. Коробкам муын, тушко тӱрлӧ кочкышым шыҥдарышт. Колташ веле кодо. А Петр шона: «Эше  нунылан могай пашам муаш? Вет пӧртыштӧ ватыжлан эре шонен кияш моткоч йӧсӧ». Маскировочный сетка нерген колын кодат, налаш шонен пыштыш. Ик эрдене олашке кудале. Ик магазиныште сеткым, весыште кӱлеш материал-влакым муо. Марина ден Настялан адак паша лекте. Пошкудо ӱдырамаш-влакат полшаш тӱҥальыч. 

Ик кастене нунын дек шоҥго Йыван кугызай тольо. Ӱдырамаш-влакын ыштымыштым шуко жап ончен шинчыш. Вара кугун шӱлалтен пелештыш: «Пошкудем-влак, поро чонан улыда. Жапым муын, пеш кӱлешан пашам ыштеда. Салтак-влак мӧҥгӧ таза-эсен пӧртылышт. Кугезе кочана-влак ожнысек тушманым талын кыреныт». Изиш мутланен шинчымек, шоҥго мӧҥгыжӧ ошкыльо. 

Чынакак, мемнан элыште поро, патыр калык ила. Сар нигӧланат ок кӱл. Но шочмо элым аралыман.