Ялын «чурийже»

Кеч-могай айдемын шочмо верже уло, кушто шкенжым ласкан шижеш, ик жаплан каналтен да у вийым налын кертеш. Калык шочмо кундемжым аралышаш, йӧратышаш да кугешнышаш. 

Кеч-могай ялым, селам эртен кайыме годым автобус остановко шинчаш перна. Тудымак ялын але селан «чурийже» манаш лиеш. Кугу Соказа ялыште шогалме вер лийын гынат, ялче-влаклан йӱреш нӧраш, пелтыше кече йымалне шогаш, теле йӱштӧ годым кылмаш пернен, молан манаш гын тудо тошто, кугу мардеж лийме годым камвочшашыже гына кодын ыле. Самырык-влак чӱчкыдын остановкеш погынен шогеныт, почешышт кленчам, окуркым, кагазым коденыт. Чыла тидым ялын унаже-влак ужын кайымышт годым могай шарнымашым коден?

Тений лум вочмо деч ончыч ял калык, оксам поген, у, мотор остановкым налын шогалтен. Ынде тудо уремым волгалтара да ару улмыж дене ялче-влакын культурыштым кӱкшын ончыкта.