Кок ял: кылым кучен илаш сай

Вес гана Маевка ял калык памаш воктене марий йӱла почеш мелна кышыл да пура корка дене Андреевка гыч уна-влакым вашлие. Тышке Чорай кундемысе карт О.М. Миронов толын ыле. Тудо калыклан Юмо деч тазалыкым, мланде ӱмбалне тыныс илышым, ваш-ваш пагалымашым йодо. Уна-влаклан памаш вӱд дене чайым йӱктымек, Маевка ял мучко экскурсийым эртарышт. 

«Шонымо дене огыл, а пӱрымаш дене», - ойла марий калык. Ондак ме уремыште памаш воктене музейым ышташ каҥашышна, но игече шонымашнам шукташ ыш пу. Тыге вашлиймашнам «Калыкын уста тӱсшӧ» мероприятий дене Чорай клубышто шуйышна. Маевка ялыште илыше Ема Кузьминична Минилбаева коважын шондыкышто аралыме вынер гыч ыштыме тувырым, шовычым, шовырым, ожно сӱан годым чийыме тӱрлӧ вургемым, Анна Сагитова шке куымо паласым, кид дене ыштыме ӱстелшовычым, коважын самырык годсо тошто воштончышым, ӧранвочкым, керосин лампым ончыктышт. Ожнысо марий калык модыш дене модмына пеш оҥайын эртыш.