«Пурен кайышым - ийын лектым шке рыскалем дене…»

Нунын илыме лавыран да лакемалт пытыше уремым ялын рӱдӧ велже деч корем ойырен шога, эҥер гоч вакшме кӱваржат шукертак тоштемын, шолдырген волаш шуын. 

Икмыняр ий ончыч тӱҥ уремеш асфальтым пыштыме годым Октябрьский уремыште илыше-влакынат шке корныштым изишак тӧрлаташ кумылышт лектын улмаш. «Корным ыштыше подрядчикын техникыже уло, кӱварым, уремнам ачалаш кӱлешан материалым шке вий дене налын ямдылаш да ялыш толшо техникым полшаш йодын ончаш гын?» - шоналтеныт нуно. Но подрядчик техникым пуаш келшен огыл. А туддеч посна, яра кид дене, нимом ышташ ок лий.

Но йӧн содыки лектын. Тений октябрь тӱҥалтыште тошто фермым пужаш толшо организаций дене кутырен келшеныт. Тӱҥжӧ - нунын экскаваторышт лийын. Фермым чоҥымо материал-влак гыч сайын аралалт кодшо пеҥгыде блок ден тувырашым петырыме перекрытий-влакым шкаланышт наҥгаеныт, а шаланыше кермыч да моло пудырго-влакым, тыгак экскаваторыштым Октябрьский уремым тӧрлаташ пуэныт. 

Уремым шотыш кондаш да ял дене ушышо эҥер гоч кӱварым уэмдаш пошкудыштым инициативный тӱшкам ыштыше-влак таратеныт. Тиде - Аплекаевмытын, Айдагуловмытын, Яныбековмытын, Вастаевмытын, Салиевмытын, Назмиевмытын, Аблеевмытын, Бадамшинмытын ешышт, Г.П. Александров, В.А. Кутлукаев. Конешне, тыгай сомылым кид да кольмо дене гына ворандарен от сеҥе, кӱм да моло материалым шупшыкташ, молыжымат ышташ кӱлеш, садлан Г.С. Аплекаев, Ю.С. Аблеев, Г.П. Александров, Ю.М. Александров, Ю.М. Янгубаев, В.М. Янгубаев, А.Н, Николаев, А.А. Бадамшин шке техникышт дене пашаш лектыныт.  

Оксам ты уремысе калык деч погеныт, тыште шочын-кушшо, но ынде Москва, Уфа, Дӧртыльӧ, Нефтекамск, Бирск олалаште илыше-влакат полшеныт. Вес урем гыч Я.Я. Аплеевын, В.А. Кутлукаевын, Л.А. Андреевын, А.Е. Зайнетдиновын, Д.Г. Зайнетдиновын, Ю.А. Апаевын окса дене полшымо поро пашаштымат палемдаш кӱлеш. Тиде сомылым тарватыше чолга еҥ-влак тыгак верысе кевытым кучышо-влак Яншаевмытлан таум ойлат.

Уремышт ялыш толын пурымо гай шыма асфальтан огыл. Но ушнен, шке вийыштлан, пошкудыштлан ӱшанен-эҥертен, тыгай чумыр пашам шуктышо еҥ-влакым талешке-влак семын аклыме шуэш. Айдеме пашаж дене мотор. Октябрьский  уремат тушто илыше калыкшылан кӧра моторын коеш.