Клубым ырыкташ пум ямдылат

Калыкын илыш йӱлажым, тӱвыражым арален кодаш манын, клуб пашаеҥ-влак тӱрлӧ пайремым эртарат. Иктаж-могай мероприятийлан ямдылалташ, тудым сайын эртараш, еҥ-влакым ушаш кеч-куштат йӧсылык лектеш. Илыш вестӱрлемын. Йоча-влак интернет да компьютер технологий дене «кылдалт» кушкыт. Самырык-влак ялеш огыт код - профессийым налмекат, шочмо-кушмо кундемыш пӧртылаш огыт тырше, кугу олалашке каят. Но клуб пашаеҥ-влак огыт ойгыро, йоча ден кугыеҥ-влакым клубышто кертмышт семын чумыраш тыршат. Тидын деч посна нунын вачӱмбаке моло кырча-марча паша возеш.

Кызыт шуко яллаште пӱртӱс газым пуртымо огыл. Тидлан кӧра клуб пашаеҥ-влакым вес йодыш тургыжландара. Телым клубым ырыкташ пум кӧ ямдылышаш? Тымбай ялыште клуб пашаеҥ-влак тений латвич трактор пум ямдыленыт. Ий еда ӱдырамаш-влак, погынен, пум шкеак шелыштыт да артанаш оптат. «Тазалыклан вуйым шиймаш уке, його воктенна пеш шуэн коштеш, садлан пӧръеҥ пашам шкат ыштен кертына», - ойла клуб пашаеҥ З.П. Баязова.

Ялыште тыгай сӱретым ужын, вес йодыш шочеш. Тӱвыра илышым пӱтынек ӱдырамаш веле нумалшаш мо? Пӧръеҥ-влак кушто улыт?