Сарзе-влаклан полыш

Краснокам районысо Йывангасолаште «Ош йӱксӧ» фольклор ансамбльын еҥже да полшаш шонышо кумылан-влак, клубышто погынен, маскировка вапшым ыштат. «Специальный военный операцийыште улшо-влаклан гуманитарный полышым кертмына семын ямдыленак шогена. Ты гана вапшым ышташ шонен пыштышна. Тыгай пашам кажне кечын изиш ыштет гын, лектышыже коеш. Кызыт кертме семын арняш кок гана погынена. Лаштык-влакым шкеак кондена, южгунам Нефтекамск олашке мийымем годым, «Искож» заводыш пурен, ямдылыме лаштык-влакым наҥгаем. Ме нуным тыглай гына огына кылде, тушко уло шӱм-чон порылык ден йӧратымашнам пунена», - ойла клуб пашаеҥ Л.В. Алынбекова.