Каныш кечынат паша шолеш

Ондак школ леведышым ачалаш шонен пыштыме ыле. Ты пашалан Бирск районысо образований пӧлка вуйлатыше А.Р. Искандаров 100 тӱжем теҥгем ойырыш. Но тиде гына шагал, садлан ялысе активист-влак шкештат оксам погаш тӱҥальыч. Ял калык, школын кӱлешлыкшым аклен, ик арняште 88 тӱжем теҥгем поген шуктыш - тунемше-влакын ача-авашт, школын выпускникше, пашаеҥже-влак, молат ӧрдыжеш ышт код.

Ондак шифер леведышым профнастил дене уэмдаш тарванышт. Пашалан кӱлеш материалым ямдылымек, адакат ял калыклан эҥерташ логале. Ялыштына ончылтенат вӱмам погат ыле, кызытат икте-весылан полшен илаш тыршена. Тиде каныш кечынат школыш шуко еҥ погыныш. Йоча-влакын ачашт, кочашт, тыглай еҥжат - кажныже полшаш тыршыш. Тыге кок кечыште школын ончыл велжым материал ситыме семын леведыч (снимкыште).

Но эше шуко паша уло. Школ леведышым мучаш марте алмаштыман, садлан уэш оксам погаш тӱҥална. Эше полшышо лектеш гын, куанен вашлийына.

Тыгай поро пашаш ушнышо-влаклан чылаштлан кугу таум ойлена, кужу ӱмырым, тазалыкым тыланена. Шонымашда шукталт шогыжо!