Пырля келшен илыме годым пайремжат сылнын эрта

Ава - кажнылан эн лишыл айдеме. Ава мемнам онча, кушта, мыланна полша, мемнам пагала. Кеч-могай йӧсӧ жап годым эре пеленна улеш, поро кидше, ласка шомакше дене эмла. 

Ноябрь тылзын пытартыш рушарняже  ава-влаклан пӧлеклалтын. Тудын вашеш  меат школыштына сылне пайремым эртарышна. Вашлиймашыш ава, кова-влак шкенан ял гыч гына огыл, пошкудо Маевка гычат тольыч. Ялсовет вуйлатыше Г.А. Саймулуковат ыле. 

Пайремнам концерт да конкурс программа дене сылнештарышна. Ава да кова-влак коклаште кок командым сайлышна, иктыже «Ковай-влак, ончыко», весыже «Шыргыжмаш» ыле. Кок командыжат «Шотым муаш», «Кулинар», «Мурым пале», «Мастер-класс» да моло конкурслаште усталыкыштым ончыктышт. Мастер-классыште чиян кагаз гыч пеледышым ямдылышна. Тиде конкурс чылалан  келшыш. 

Тунемше-влак шӱмсем пӧлекым ямдылышт. Почеламутым каласкалышт, мурым мурышт да «Аван илышыж гыч ик кече» сценкым модын ончыктышт. Пайрем мучаште чыланат чайым йӱна. Кажныже тамле кочкышым конден ыле. Ава пайрем мемнам иктыш ушыш. Кунам пырля келшен илет, йӧсымат сеҥет, ваш пагалет да икте-весылан полшет. Вийым пырля ушен, чыла сеҥена манын ӱшанена.