Все новости
Ял илыш
1 теле 2022, 10:31

Порылык поро денак пӧртылеш

Римма Агзамовна Назарова - кум икшыван ава, пеш поро, ушан-шотан ӱдырамаш. Тудо мобилизацийыш логалше ялче-влаклан полышым ышташ кӱлмӧ каҥаш дене Йывангасола ялсоветым вуйлатыше К.К. Зайнакаева деке миен.

Тыгай паша шукертак шукталтеш гынат, 22 ноябрьыште Клара Камыкаевна активист-влак дене погынымашым эртарыш. Ялсоветым вуйлатыше районысо ситуаций, мобилизоватлыме ялче-влаклан полышым ыштыме нерген каласкалыш.  Мемнан Йывангасола гыч лу рвезым мобилизоватленыт. А чумыржо коло утлаш погына (Нуно Йывангасолаште шочын-кушкыныт, йоча жапыштым модын-воштыл эртареныт, ик школыш тунемаш коштыныт. Школ деч вара кажныже шке корныжым муын, илыме вержым вашталтен да тӱрлӧ верлаште лакемын. А ава-ачашт Йывангасолаштак илат, садлан ме нине рвезе-влакымат шкенанлан шотлена.).  

Нунын кокла гыч южыштын икшывышт тӱрлӧ кружоклаште шуаралтеш, мемнан воктене кугемеш. Теве Я. Кондратьев кумшо классыште тунемеш, кушташ туныктымо кружокыш коштеш. Пеш чолга рвезе. Южгунам ачаж нергенат каласкала: «Теҥгече ачам дене мутланышна, сай тунемаш, авайлан полшаш, кочайым колышташ, книгам лудаш шӱдыш». Йоча ачажын йӱкшым колын, телефон дене мутланен - тидыже тудлан моткоч кугу куан. А теве изи, кок ийыш веле тошкалше йоча ачажын телефонжым нигӧлан ок пу. «Ача-ача» манын, я аважлан, я коважлан намиен кучыкта», - ойла Л. Изибаева. Тыге кутырен погынымаште ик ойыш шуна - мобилизоватлалтше-влаклан кӧ окса дене полша, кӧ пижым, носким да молым пуэн кертеш. Тиде пашашке тунемше-влакат ушнат. Кажне ялыште активист-влак палемдыме сомылым «Молодая гвардия» ушем дене пырля шукташ тӱҥалыт. Салтак-шамычлан полшаш кумылда уло гын, поро пашашке чылан ушныза. Порылык, шӱдӧ гана ешаралтын, поро денак пӧртылеш. Тидым ида мондо.

Автор:Л. АЛЫНБЕКОВА. Краснокам район.
Читайте нас в