Чыла пашам шонкален-вискален ыштыман

Стелын значенийже пешат кугу: тушан мемнан ачана, кочана, изана-влакын лӱмышт ӱмырешлан сералт кодеш. Арамлан огыл «Пера дене возымым товар дене руэн кудалташ огеш лий» маныт. Тудо ял калыкым, кушто илымыжым ончыде, пырля келшен, икте-весылан полшен илаш ӱжеш.

Мый 2021 ий октябрьыште Калтаса районын «Заря» газетыштыже Калмиямучаш ялсоветыште Кугу Ачамланде сарын участникше-влаклан стелым кузе шогалтыме нерген лудынам ыле. Краснокам районыштат чыла гаяк ялыште стела-влак улыт. Мыят «Ме моло-влак деч мо дене ударак улына» манын шоналтышым да райгазетыш «Ме фашизмым сеҥыше-влакым мондышаш огынал» статьям возышым.

Вара Амчемучаш ялсоветыш кошташ, йыҥгырташ тӱҥальым, район администраций вуйлатыше дек мийышым, ала изиш материально полшат ыле манын, йодмашым возышым. Полыш ыш лий. Ял калык шке оксаже да шке вийже дене стелым шогалташ кутырен келшыш. Еҥ-влак деч оксам погеныт, а мый Арлан заводын лукмо 3 поддон облицовочный кермычым да 6 тӱжем теҥге оксам намийышым. Чыла яллаште пӧртым, зданий да стела-влакым тиде кермыч денак чоҥат гынат, тудо ала-молан «специалист-влаклан» келшен огыл, 30 тӱжем теҥгелан вес кермычым налыныт. 

Моло ял-влакат, сай примерым ужын, стелым але молым ышташ тӱҥалыт гын, икмыняр темлымашым шотыш налын кертыт. Эн ончыч мланде йодышым шотыш кондыман (отвод земли), проектым, сметым ыштыман да конкурс почеш подрядчикым кычалман. Инициативный тӱшкаш честный, принципиальный еҥ-влакым сайлаш кӱлеш, коклаштышт чоҥышо специалистат лийшаш. Калык деч погымо оксам, каҥашен, палемдыме сомыллан гына кучылтман. Организатор-влак мероприятийым «еш пайремыш» гына савырышаш огытыл.

Кожлаял-влак стелым намийыме кермыч дене ыштат гын, ял калык деч кокымшо гана оксам погаш ок верешт да чоҥышо специалист дене шонкален-вискален ыштыме годым стелат кугурак да моторрак лиеш ыле, шонем.

Вес яллаште стелым шогалташ шонышо-влак лектыт гын, ты пашам поро кумыл дене, каҥашен, шонен ышташ тыланем.