Тунам В. Миронов моряк-влакланат тыгай Чап кӱм ышташ кӱлмӧ нерген шонымашым каласен. Тудын ойжо дене В. Ибраев, Ю. Изибаиров, А. Исмагилов да молат келшеныт. Тыге кӱчык жапыште, оксам поген, вийым пыштен, 31 июль - Теҥыз флотын кечыже - марте чапле стелым ыштен шуктеныт. Моряк-влаклан стелым почмо пайремыш Чорай сельсовет ял поселений гыч Теҥыз флотышто служитлен пӧртылшӧ пӧръеҥ-влак гына огыл, уна, ял калыкат шуко погынен. Самырык тукымым патриотизм шӱлышеш куштымашке надырым пыштыше ялче-влаклан шуко еҥ таумутым ойлен.