…Кодшо шуматкечын тиде мотор марий ялыште кугу пайрем лие. Кожлаялын шочмыжлан - 338 ий. Пайрем кечым уло ял калык поро кумыл дене вашлие. Тиде шочмо кече гына огыл, тыште калык полшымо дене кугу да поро паша шукталтын: Кугу сарын тулыштыжо вуйым пыштыше да немыч тӱшкам кырен шалатыше патыр-влаклан шарнымаш стелым почмо. Суапле пашам ял калык шке вийже дене шуктен - кӧ окса дене полшен, кӧ шке кидше дене кермыч гыч пырдыжым нӧлтен. Тӱҥжӧ - тиде сомылым уло кумыл дене шуктеныт. Кугу пайрем да поро пашам шуктымо дене ял калыкым Калтаса райадминистрацийын тӱвыра пӧлкажым вуйлатыше Г.В. Лисков, депутат Г.А. Биктимиров, Амзибаш ялсоветын вуйлатышыже Л.Ю. Изиланова саламлышт. Тиде кечын шуко поро мут йоҥген, ятыр пӧлек лийын. Чыла сылне поро шомак уло ял калык лӱмеш шергылтын. Пагалыме кугу ийготан ял калыкым пӧлек дене куандарышт. Кӧ вийжым чаманыде тыршен, нунымат пӧлек деч посна ышт кодо. Пайремым Калтаса, Краснохолмский села, Амчемучаш, Сылвий ялла гыч мийыше мурызо, усталык коллектив-влак сӧрастарышт.
Ял калык пайремлан пеш сайын ямдылалтын. Ӱстел тич сий пушланен. Шокшо кочкыш нергенат монден огытыл, ик лукышто кугу под дене кӱктымӧ тамле пловын, воктенжак шашлыкын пушышт шарлен, ожсо илыш семынак, самоварыште шокшо чай шолын. Пайремым ямдылыше калыклан пеш кугу таум каласыме шуэш. Эре тыгак весела, таза, икоян лийза да икте-весыланда полшен, поро кумыл дене, куанен илыза.