Куанем тыгай ялеш шочмемлан

Эрвелне Ек эҥер шыргыгтен йога, серыштыже олык тӱҥалеш, умбалнырак - чодыра. Чылажат пеш мотор! Ялыштына ик километр наре шуйнышо кужу уремна уло, весыже - вич кудан торешла урем. Уло элысе гаяк ялна иземеш. Туге гынат ялысе калыкна пеш пашаче, чыланат ваш келшен илена. Ӧрдыж кундемыште илыше шочшына-влакат пеш поро чонан улыт, ялнам сагынен, шарнен илат.

Тений ме, ППМИ конкурсыш ушнен, ял уремнам тӧрлаташ кутырен келшышна.

200 000 теҥге оксам кузерак погаш манын, лӱдын колтышна - вет кызыт ялыштына 42 сурт веле кодын. 100 000 теҥгем ялыште погыман, 100 000 теҥге спонсор-влак деч пурышаш - тиде конкурсын условийже.

Кӱкшӧ баллым поген , 99 процент дене конкурсышто сеҥымеке, оксам погаш тӱҥална. Ик савырнымаште ял калык кажне сурт гыч 3 500 теҥге дене пуыш. Пеш чот куанен колтышна. Интернетыште «Одноклассник» соцсеть лаштыкыш ППМИ конкурсын условийжым серен колтышна. Кок арня коклаште 100 000 тенге дечат шуко окса пурыш. Оксам колтат да ялым сагынен илымышт, полшаш ямде улмышт нерген возат.

Ял калыклан да чылаланат, кӧ мыланна спонсор полышым пуэн, инициативный группа лӱм дене «Чолман» газет гоч пеш кугу таум каласем! Пиалан лийза, тек илышда ласкан эрта, чонда яндар лиеш, кузе мемнам куандарышда - тугак тендан кумылдат куан дене лыҥ темын шогыжо!

Мый куанем тыгай ялеш шочмемлан, эсогыл тыге муралтыме шуэш:

Эх, Тӧҥгак, эх Тӧҥгак,

Мыйын шочмо ял!

Тый изи улат гынат,

Ом ойгыро мый ялт!