Все новости
Ял илыш
25 Апрель 2022, 15:15

Изи ялын кугу куанже: Вязовкын курымаш лӱмгече пайремжым кече шыргыжын ончен

Пӱрӧ районысо Вязовко ялын 100 ияш лӱмгечыжым 23 апрельыште палемденыт. Тиде кечым чылан изин-кугун вученыт. Молан манаш гын, уло ялге пырля погынен, икте-весым ужын мутланаш - тиде пеш сай амал, вуйыштышт такмакын  тыгай корнылаже-влакат пӧрдыныт дыр: «Ай, ок лий вет, ок лий вет, Йыле ужаш ок лий вет. Йыле ужаш лиеш гынат,  Ойлен шогаш ок лий вет!»

Шукышт ынде олаште илат, икте-весе дене телефон гоч веле кылым кучымо саманыште ялыш южгунам, тӱҥ шотышто каныш кечын, ача-ава, коча-кова дек кеч изи жаплан толылден каят… А шочмо ялыштын лӱмгечыжым пайремлыме кечын  ваш шогалын кутыраш йӧн лектын.

Ял калыкым саламлаш мурышо-куштышо тӱрлӧ ансамбль-влак толыныт. Пеш мотор концертым ончыктеныт. Изи гына Вязовкын пырля чумыргышо калыкше шкенжын куанжым чыла дене лош пайлен. Кушто гын гармонь почеш тавалтеныт, а куштыжо, муралтен, шинчавӱдымат луктыныт. Мотор деч мотор моткоч шуко тӱрлӧ калык - марий, руш,татар, башкир - вургемым чийыше-влак лийыныт. Лыҥ модышым, конкурсым, куштылго атлетика дене таҥасымашым эртареныт, шахматын пӱсӧ ушан мастарже-влакым рашемденыт... Икманаш, иктат ӧрдыжеш кодын огыл. Тек умбакыжат ял пайремыштым эртарыме гаяк татун илат.

Автор:Л. БАЙРАМОВА. Пӱрӧ район.
Читайте нас: