Корным тӧрлаш шона

Эн кÿлешан да тургыжландарыше йодышла гыч иктыже - ял уремысе начар корно. Телым тудым лум петырен кая гын, кеҥежым, шошым, шыжым лавыран лакыла гоч нимо денат эртышашлык огыл. Изи ялын вийжат изирак, корным шке вийышт дене ачалаш ÿнарышт ок сите. Тидлан верчынак Ардаш ялсоветын темлымыж почеш мемнан ялна верысе инициативылан полышым пуымо программыште участвоватлаш келшен. 

Ял калык, икмыняр гана чумырген, тиде программыш пураш кÿлмӧ нерген мутланен. А 26 ноябрьыште иктешлыше погынымашыш Мишкан районын тиде программылан вуйын шогышо кураторжо З.А. Шамсутдиновам, Ардаш ялсовет вуйлатыше А.М. Ильтубаевым ÿжыныт. 

Мутланен, кутырен келшыме почеш Тöҥгак калык, урем корным ачалаш манын, ППМИ программыш пурымо верч йӱклен. Но тиде сомылым ворандарен колташ ик ужаш оксажым калык деч погыман, садлан сурт еда оксам погаш, спонсор-влакым ушаш кутырен келшеныт. Тыгак Тöҥгак ялыште шочын-кушшо, но кызыт вес кундемлаште илыше марий-влакат ӧрдыжеш огыт код манын шонена -  нунымат тиде сай пашашке шке надырыштым пышташ йодына.

 Погынымашыште программылан вуйын шогышо активымат сайленыт. Нуно, тиде проектыште сеҥымашке шуаш манын, программын задачыже-влакым шуктымо пашалан вуйын шогаш тÿҥалыт. Чылажат шонымо семын лиеш да вес ийлан ялыштына корным тӧрлат манын, ÿшанен кодына.