Чын пашам шуктат. Погынен, ик ой дене каҥашен. Пытартыш ийлаште калыклан келшыше мероприятийламат, чумырген, шке вийышт дене эртарат. Садлан ялыштат утыр моторлана.
Чолга марий-влак тушто илат. Кумдан палыме спортсмен, военный, артист, драматург, писатель, туныктышо, кӱкшӧ квалификациян врач, мӱкшызӧ, кӱртньӧ гыч пеледышым ыштен моштышо мастар-влакым шотлаш тӱҥалат гын, кок кидысе парнят ок сите. Тыгай талешке да мастар-влаклан шочаш тусо памашын але ял воктеч йоген эртыше эҥерын юзо вийышт полша дыр, манылдат южгунам. Но чынже, очыни, поро пашан тукым гыч тукымыш куснен толмо йӱлажым шуктымаште, икте-весым умылен моштымаште. Чыным ойлаш гын, шке йырет молымат чумырен, мер пашам шуктен шогаш общественник лийын шочашак кӱлеш, тиде - аван шӧржӧ дене шыҥдарыме вий, садлан тыгай еҥ-влакын пашаштат ушна, нуным калыкат пагала.