Киндым куштет - илет… Тыгак илат ялет, элет

Шышталге шурно толкыным шелын, СК-5 «Нива» комбайн Искуш пасун кӱкшакаж гыч тайыл почеш Маядык могырышкыла «иеш». Тыште, «Галеев» ИП озанлыкыште, уржа-сорла тургымын шыгыр жапше. Штурвал - Руслан Галеевын пеҥгыде кидыштыже. Кресаньыкын илышыштыже шурным погымо паша эн кӱлешан, садлан кажне минутшат шерге, тудым яралан йомдарыме ок шу. Таче игече мотор да кеҥежымсе гай шокшо гын, кӧ пала, эрла кузе тудо савырна. Туге гынат Руслан Валериевич, комбайнжым шогалтен, кутыралташ икмыняр минутым ойыраш келшыш.

Ял озанлыкысе мландыштышт шурным куштымо пасу 200 гектарым айла. Тушеч 150 гектар кумдыкыштыжо шыдаҥ ден шожым ӱденыт, а 50 гектарыште шемшыдаҥ кушкеш. Шыдаҥымат, шожымат кум тӱрлӧ урлыкым кучылтыт. Шожым поген пытареныт, ынде шыдаҥ пасушто сомылыштым шуктат. «Кокла шот дене ончалаш гын, - ойла Р. Галеев, - шожым гектар гыч 26 центнер дене налынна. Но «Лидар» лӱман у урлык тений умен, гектар гыч 30 центнерым пуэн. Мемнан ошман мландыштына тиде пеш сай лектыш».

Пасуш ончен, шинчат куана. «Чышт» маныт тыгай годым, нимогай шӱкшудо уке, лӧза шыдаҥ вуйысо шолдыра пырче-влак кечыште шӧртнялге падыраш гай йылгыжалтыт. Лектышыже шож деч уда огыл, ик гектарлан 26-28 центнер дене логалеш.

Шурным, пасу гыч тӱҥалын, амбар марте шуктымо корнышто комбайнер-влак Р.В. Калиев, Е.Т. Кабитов, тракторист А.В. Алетдинов, шофер Д.Р. Ильтубаев тыршат. А туштыжо ОВС-25 агрегатын озаже В.К. Каликаев шке машинаже гоч шурно толкыным пуалтен луктеш.

Ял озанлыкыште тачысе лектыш дене гына серлагаш ок лий. Ончыкылык нергенат шоныман. Вес ийлан пырчан кушкылым ӱдымӧ пасум 500 гектар марте кумдаҥдаш шонат. Кызыт 50 гектар кумдыкышто кылмаш куралалтын, озымым ӱдаш тымарте куралдыме ешартыш мландым налыныт. Ял озанлык вуйлык да тудын пашаеҥже-влак ончыко ӱшанлын ончат, шонымашкышт шуаш кумылыштат, вийыштат, негызыштат - тидлан кӱлешан техникышт - ситышын. Пресс-подборщикым гына налшаш кодын, тидыжымат йӧнештараш шонат. Но икте тургыжландара: ГСМ утыждене шерге. Мутлан, ДТ-75 тракторым ик гана заправитлаш налме соляркын акшым петыраш ик тонн шурным ужалаш кӱлеш. «Но ме тыршена, марий-влак пашаче калык улына, - ойла ял озанлыкын вуйлыкшо. - Колхоз-влакым шалатен пытарышт. Кызыт мемнан задачына - шочмо ялым лунчыртымо деч арален кодаш. Пасушто шӱкшудо але чодыра огыл, кинде толкыналт кушшаш. Тунам ял ила, моторлана. Шурно дене пырля олымжат, вольыкшат, ончыкылыкшат лиеш».

Читайте нас:

Главный редактор - Губаев Игорь Иванович.

При использовании материалов гиперссылка на сайт cholman.info обязательна.

Категория информационной продукции 12+

Связь, информационный технологий да массовый коммуникаций сферым эскерыше Федеральный службын Башкортостан Республикысе Управленийже 2016 ий 11 июльышто ПИ ТУ02-01543 № дене регистрироватлен.

Мы в соцсетях:

ВКонтакте - vk.com/cholman

Telegram - https://t.me/cholmantv

Я.Дзен - https://dzen.ru/cholman

ОК - ok.ru/cholmanrb

TikTok - tiktok.com/@cholman.tv

Телефон

Телефон: 8(34783)7-07-97.

Электрон почто

[email protected]

Адрес

Адрес редакции, типографии: 452688, Республика Башкортостан, г. Нефтекамск, Березовское шоссе, 4А, 1 этаж. Для писем: 452688, Республика Башкортостан, г. Нефтекамск, 8-е почтовое отделение, а/я 116, для редакции газеты «Чолман».