Гармонь йӱкышт весела

Тидлан ынде иктаж 68 ий эртен гынат, тачат У Эшым ялысе кажне музиканче шинча ончылно, шоктымо семышт пылышыште йоҥга. Мемнан ялна изи ыле - 36 кудо веле, но кажныштыже илышым йӧратыше, поро чонан еҥ-влак иленыт.

1944-1955 ийлаште ялыште радиом да телевизорым ужмо гына огыл, тыгай мутшымат колын огынал, туге гынат самырык-влак вийым чаманыде пашам ыштыме деч вара яра жапыштым веселан эртарен моштеныт. Иктаж-кӧ музиканым шоктен гын, ӱдыр-эрге-влак йырже чумыргеныт. Шоктымо мастарлык да поро чонан улмыж дене Андрян Васин ойыртемалтын. Гармонь шоктен моштышым поснак чот пагаленыт, сандене шокташ шонышат шуко лийын, но нуным нигӧ туныктен огыл, шкак гармоньым кучен шинчылтыныт да тунемыныт. Калыкыште «Пелйӱдым мончаште музиканым кучен шинчат гын, шкак шокташ тунемат» манын ойлыштмым колын, мончаште тунемшыжат лийын.

Музиканым шоктен моштышо коклаште илалше пӧръеҥ-влак ятырын ыльыч: Сайнуш Сайдуганов, Николка Сайметов, Никита Ижбулдин, Пайгыза, Панька Байрашевмыт, Сатылай Ибаев (ялыште нуным тыге лӱмденыт). А сар деч вара, 1947-1956 ийлаште, рвезырак-влак уста гармонистыш савырненыт: Мирон Иликбаев, Кольошка Петкин, Вася Валишин, Сайди, Кайни, Санька Гайнетдиновмыт, Валентин, Саша Васинмыт (нунын еш гыч вич музиканче лийын), Миша, Гриша Тазетдиновмыт (нунат вич эрге улыт, чыланат шоктен моштат). Южо еҥым ушештарен омыл гын, ида ӧпкеле. Эше мо оҥайже: кажне гармонистын шкенжын музиканже лийын. Калык кажне мастарын семжым, музикан йӱкшым ала-кушеч пален, мутлан, «Тиде Кайнден Санькан семже!» маныныт.

А Иван Камилянов (ялыште Йыван маныныт) уста скрипач ыле. Тудын шоктымыжо кызытат шинча ончылно. Поро шинчаж дене ончалын, шыргыжалын, семын кажне лукышкыжо пурен шоктен колтен, шӱмеш логалше, муҥло сем-влакым луктын. Еҥ-влак тудым шулен колыштыныт, южыжын шинчавӱдшат лектын, куштымо сем почеш тавалтышат лийын.

Чаманен каласаш логалеш, южо музиканче-влакын тукымышт кодын огыл, а нунын мастарлыкышт, шоктымо семышт кызытат калык шӱмыштӧ ила.

Читайте нас:

Главный редактор - Губаев Игорь Иванович.

При использовании материалов гиперссылка на сайт cholman.info обязательна.

Категория информационной продукции 12+

Связь, информационный технологий да массовый коммуникаций сферым эскерыше Федеральный службын Башкортостан Республикысе Управленийже 2016 ий 11 июльышто ПИ ТУ02-01543 № дене регистрироватлен.

Мы в соцсетях:

ВКонтакте - vk.com/cholman

Telegram - https://t.me/cholmantv

Я.Дзен - https://dzen.ru/cholman

ОК - ok.ru/cholmanrb

TikTok - tiktok.com/@cholman.tv

Телефон

Телефон: 8(34783)7-07-97.

Электрон почто

[email protected]

Адрес

Адрес редакции, типографии: 452688, Республика Башкортостан, г. Нефтекамск, Березовское шоссе, 4А, 1 этаж. Для писем: 452688, Республика Башкортостан, г. Нефтекамск, 8-е почтовое отделение, а/я 116, для редакции газеты «Чолман».