Все новости
Ял илыш
12 Июнь 2020, 12:35

Кедр аллей

Сеҥымаш кечылан 75 ий темме лӱмеш тений эл мучко шуко мероприятийым эртарышт да кызытат эртарен шогат. 28-ше май - Пограничник-влакын кечышт - мемнан ялыштат тыгай кӱлешан вашлиймаш да поро паша дене шарнаш кодо. Тӱрлӧ жапыште армийыште служитлыше пограничник-влак, пырля погынен, кедр аллейым почыч.

«Пограничник-влак ончычсо огыт лий», - маныт шкешт, сандене нуным кызытат тыгак лӱмдат. Ялыштына индеш пограничник уло. Тиде Г.А. Аликов, В.Е. Захаров, Р.И. Апсатаров, А.Я. Янситов, Ю.С. Шакмаев, С.М. Сагадеев, Е.В. Изиляев, В.А. Михайлов, Э.О. Валитов. Нуно Совет Ушем жапыште кугу элнан тӱрлӧ кундемлаштыже границым ороленыт. Кызытат кажне ийын пайремышт кечын шке ямдылыме да погынымо верыштышт армий жапысе илышыштым шарналтен шинчат. Вашлиймаш пайремышт Кугу Ачамланде сар участник-влаклан почмо обелиск воктек пограничник-влак лӱм дене венокым пыштыме гыч тӱҥалеш. Нунын кокла гыч кажныжын кочаже, ачаже шучко сарыште лийыныт да тушман ваштареш кредалыныт… Тений шучко вирус шарлымылан верч шукын пырля погынаш огеш лий, сандене пограничник-влакын ватышт, йочашт да моло еҥ-влак тыгай мероприятийыш миен ышт керт. Моло ийлаште тиде кечым чылан пырля погынен палемдат ыле… Вашлиймаш программыштышт моло тӱрлӧ паша да границысе службым шарналташ тӱрлӧ конкурс-влакат улыт…
Пограничник-влак ий мучко ялсовет дене пеҥгыде кылым кучат. Яллан иктаж кӱлешан пашам ыштышаш уло гын, мутлан, ялым тӱзаташ, кол пӱям эрыкташ, пушеҥге-влакым шындаш але моло сомылым шукташ - пограничник-влак полшаш эре ямде улыт. Тыгак пашаште да еш илышыштат моло еҥ-влаклан сай примерым ончыктат. «Кӱртньӧ тодылалтеш - пограничник нигунам!» - нунын йӧратыме ойсавыртышышт...
Читайте нас в