Монарыште порылык да пагалымаш кечым палемдышна

Сулен налме канышыш лекше-влакын черетан погынымашышт эртыш. Тышке шукыжым кова-влак коштыт. Коча-влак шагалынрак койыт. Ӱдырамаш ок ӧркане, ужмо верыш мияш, йодмым шукташ тырша. Вес могырым, пӧръеҥ-влак шукыжо шоҥгылык марте илен огыт шу, ош тӱня дене рвезынек чеверласат.

Ветеран-влак Советым вуйлатыше А.А. Сайсанова йолташыже-влак ончылно ыштыме пашам иктешлыш. Тыште пеш куандарыше увер-влак йоҥгышт. Д.Б. Иманбаева районысо шахмат-шашке турнирыште икымше верым сеҥен налын. В.Я. Султанбаев пӧръеҥ-влак коклаште сеҥышыш лектын. А. С. Сайфутдинова, П.Я. Яншаев, Н.П. Минилбаева, Э.И. Иманбаев сай лектышым ончыктеныт. Мемнан кова-кочана-влак уш-акыл тазалык верч гына огыл тыршат, кап таза лийже манынат шонат. Кас еда Монар уремыште шуко еҥым вашлияш лиеш. Кӧ скандинав ошкылмаш дене заниматла, кӧ уремыште тыглай коштын савырна, куржталшыжат вашлиялтеш. Лум деч эрыктыме, асфальт гай кумда корнан уремыште яндар южым шӱлен кошташ пеш каньыле. Урем мучко лампым пижыктылме, сандене кастене кечывалымсе гай волгыдо, пӧртыштӧ телевизор ончылно йӧршынат шинчыме ок шу. Ялсовет тыршымылан кӧра ялыштына тыгай сай вашталтыш-влак лийыныт.

Ялсоветын пашаеҥже В.Е. Захаров пожар лӱдыкшӧ нерген каласкалыш. Республикыште пытартыш жапыште мыняр шучко пожар лийын, мыняр еҥ йӱлен колен! Тыгай ынже лий манын, пожарный извещательын кӱлешлыкше нерген увертарыш. Кӧн уке гын, ялсовет администрацийыш мияш каҥашым пуыч. Кычал кошташ огыл манын, ялсовет пашаеҥ-влак оласе кевытыште шкеак налын толыныт да, кӧлан кӱлеш, ялыште пуэдышт. Тыгай изи, но кӱлешан сату ятыр еҥын илышыжым арален коден. Шоҥгыеҥ-влакланат каньыле: нигуш кычал коштман огыл. Кевытыш батарейкыже-влакымат ужалаш кондыктымо, миен налаш да пижыкташ веле кодеш.

Собранийыште тӱҥалтыш гыч мучаш марте шочмо марла йылме дене кутырышт. А.А. Сайсанова, В.Е. Захаров марла эплын, яндарын ойлышт, мый куанен колышт шинчышым. Толшо еҥ-влакланат келшыш, шонем: нуно шкеат марла кутыралтен колтышт, иктат вожылын, лӱдын ыш шинче. Тыге марла ойласыме годым шочшо-влак дене погынен, икте-весе дене мутланен шинчымыла чучеш.

Ялысе библиотекарь Э.Б. Иманова салтак-влак нерген книга выставкым ямдылен. Афганистаныш мийыше-влак нерген книга дене палдарыш. Книгаш ялна гыч ныл еҥым пуртымо. Тиде В.Е. Захаров, С.С. Сайсанов, Ю.А. Иликаев, А.И. Иргубаев. Нуно Афганистаныште служитленыт, кызыт шочмо ялыштына пагалыме айдеме улыт. Вара чылан пырля салтак-влак нерген «Катюша», «Землянка», «Идет солдат по городу», «Вот кто-то с горочки спустился» мурым муралтышт. Музиканче Ю. Иликаевын музикан дене мастарын шоктымыж почеш иктат мурыде ыш код!

Кова-коча-влакым уныкаштат саламлышт. Пайрем концертым пеш чаплын ончыктышт. Шоҥгыен-влак куанен ончышт. Южиктыштын, рвезе жапым шарналтен, шинчавӱдыштат лекте. Тыгай сӱретым ужмо годым кумыл тодылалтеш. Кова-коча, ава-ача-влакым, кажне еным куандараш вашкыман. Вашлийме годым саламлалташ, поро шомакым пелешташ, тазалыкым тыланаш, шочмо марла йылме дене мутланаш йӧсӧ мо? Неле огыл. А еҥлан куан, кумылжо нӧлталалтеш, илымыже шуын колта…

Тугодым кастене клубыштына эше ик концерт лие. Школысо тунемше, клуб пашаеҥ-влак, сылнын мурен-куштен, адакат ял калыкым куандарышт. Военный муро-влак шергылтыч, марла куштымаш да муро-влак ончаш толшо-влакын чоныштым тарватышт. Пайрем касым «Кандыра» куштымаш мучашлыш.

Читайте нас:

Главный редактор - Губаев Игорь Иванович.

При использовании материалов гиперссылка на сайт cholman.info обязательна.

Категория информационной продукции 12+

Связь, информационный технологий да массовый коммуникаций сферым эскерыше Федеральный службын Башкортостан Республикысе Управленийже 2016 ий 11 июльышто ПИ ТУ02-01543 № дене регистрироватлен.

Мы в соцсетях:

ВКонтакте - vk.com/cholman

Telegram - https://t.me/cholmantv

Я.Дзен - https://dzen.ru/cholman

ОК - ok.ru/cholmanrb

TikTok - tiktok.com/@cholman.tv

Телефон

Телефон: 8(34783)7-07-97.

Электрон почто

[email protected]

Адрес

Адрес редакции, типографии: 452688, Республика Башкортостан, г. Нефтекамск, Березовское шоссе, 4А, 1 этаж. Для писем: 452688, Республика Башкортостан, г. Нефтекамск, 8-е почтовое отделение, а/я 116, для редакции газеты «Чолман».