Все новости
Ял илыш
27 Пургыж 2020, 19:35

Электротулет нигунам ынже йӧрӧ

Ялыште илыше кугезына-влак нигунам йӱдым тул деч посна шинчен огытыл. Йӱд кужу, ыштышаш паша шуко лийын: ача йыдалым пидын, ава кӱнчылам шӱдырен але вынерым куэн, тӱрымат тӱрленыт. Ончыч пӧрт кӧргым чыра тул дене волгалтареныт. Тидлан кечывалым шуко чырам ямдыленыт. Икмыняр жап гыч керосин лампе дене пайдаланаш тӱҥалыныт.

Ик шыже кечын ача-влак пӧрт воктеран меҥгым кӱнчен шындышт, а электрик электротулым пуртыш. Ялыште кажне пӧртын окнаже волгалте. Ынде электротул деч посна иленат огына керт.
Ӱткӱстӧ ялна пеш кугу огыл, туге гынат пӧртыштӧ гына огыл, уремыштат электротул йӱла. Электрикна Виктор Губаев пашажым шуктен ышта. Стажшат кугу: армий деч вара электриклан ышташ тӱҥалын да кызытат тиде сомылжымак шуя. Ялыште кажне у пӧртышкӧ электротулым тудо пуртен. Эше пошкудо яллашкат ӱжыт. Школ кочегаркыште ончыч вестӱрлӧ котел-влак шогеныт. Моторышт (двигательышт) чарнен шогалме годым Виктор нунымат олмыкташ полшен. Тудын паша верже Артакул селаште. Фермыште, токышто, трактор-влак шогымо верыште электрик эре кӱлеш. Эрдене кечын пашашкыже вашка. Ял калык тудым пагала, моктен ойла. Пӧртыштӧ провода-влакым вашталташ ӱжыт гын, вуйым ок шупш, вашкыде гына вашталта. Паша верыштыже тудым аклат, наградыжат ятыр.
Пелашыже Юлия Пайметовна дене кум икшывым ончен куштеныт. Кугу эргышт ден ӱдырышт институтым тунем пытареныт, пашам ыштат. Изи эргышт пеленышт улеш. Кеҥеж мучко нунын кудывечыштышт уныка-влак юарлат. Коча, уныкаже-влакым машинашкыже шынден, унала кондыштара.
Виктор Губаев, электротулет нигунам ынже йӧрӧ. Пашаштет уҥымашым тыланен кодам. Юлия ватет дене вычыматен илыза, уныкада-влак куандарен шогышт. Шушаш юбилеет дене саламлем, кужу ӱмырым да тазалыкым тыланен кодам.
Читайте нас в