Теле пайрем

Школ оралтыште шуко кож кушкеш, иктышкыже гирляндым сакыме - тудо кастене торашке волгалтеш. Кожшат вараш ыш код, тӱрлӧ модыш дене моторланыш. Йоча-влаклан моткоч келшыш. Кож йыр мурышт-куштышт, кажныже пӧлекым модын нале. Костюмымат ышташ ӧрканен огытыл. Э.М. Имучаева, Н.М. Сулейманова йоча-влакым мураш-кушташ, почеламутым ойлаш кумылаҥденыт. Р.В. Ишкинина ден М.И. Янибекова елка йыр тӱрлӧ модыш дене модыктышт. Константин Губаев, мотор Йӱштӧ Кугыза, модшо-влаклан призым пуэдыш, тудлан чевер Лумӱдыр, Людмила Акмуллина, полшен шогыш. Школысо У ий пайрем чыла толшо уналан келшыш. Мучашлан кудымшо классыште тунемше-влак лотерей билет дене лекше арвер-влакым шалатышт. Чыланат мом-гынат модын нальыч, ӧпкелыше ыш лий. Йӱштӧ Кугызан пуымо изи пӧлек мешакыштым кучен, тунемше-влак мӧҥгӧ шаланышт. Ава-ача-влак йоча-влаклан спонсор лийыч.

Кожна чодыра гыч руэн кондымо огыл. Ялысе токарьна, Борис Губаев, пуч-влакым ушкален, негызым ыштен ыле. Кажне ийын тиде пуч-влакыш кож укш-влакым кередена, да мотор елка лийынат шогалеш.

Школым ончен, клуб пашаеҥ-влакат лум гыч Йӱштӧ Кугыза ден Лумӱдырым ыштен шогалтышт, нунын воктен ийгурыклан лумым поген ситарышт. Кумло икымше декабрьыште клубышто шинчаш вер ыш код, вараш толшо-влаклан шогаш вереште. Нунат шып гына ышт шого. Моло йолташышт дене пырля мурышт-куштышт, тӱрлӧ модыш дене модыч, лотерей билетышт дене шуко пӧлекым модын нальыч. Кок-кум еҥлан ик мешак дене шурнат логале.

Школысо йоча-влакын ончыктымо концертыш мӧҥгӧ пӧртылшӧ студент-влакат ушнышт. Нуно ончычсо марла куштымашыштым монден огытыл, погынышо-влакым куандарышт. Йӱштӧ Кугыза ден Лумӱдыр нерен ышт шого, кажне модшылан пӧлекым шалатышт. Светлана да Валентин Алеевмыт рольыштым сайын шуктышт.

Школ уремыште илыше ӱдырамаш-влак кажне ийын лум гыч мом-гынат ыштат. Тений Римма Байрашева, Екатерина Бикмасова, Эльза Имучаева, Алина Миникаева, Таисия Янибекова, Глафира Губаева шке пашашт дене кугешнен кертыт. Нунын ыштыме Лумӱдыр, Йӱштӧ Кугыза, сӧсна, коля да моло янлыкышт мӱндырчын койын шогат. Эртен кайыше йоча-влаклан моткоч келшен. Эше Рвезылык урем гыч Ирина Акмуллинан да Ольга Янибекован, Школ уремыште Люда Абсаликован, Эльза Имучаеван, Марианна Янибекован, Алина Миникаеван, Глафира Губаеван, Покшел уремыште Федор Шамсутдиновын, Георгий Имучаевын, Алина Аплекаеван пушеҥгеш сакалыме гирляндышт мӱндыркӧ волгалтыт.

Пайрем веселан эртыш. У ийлан ямдылалтше-влак кажне ийын шукемыт. Нунын пашаштым ончетат, чыла ойгетым мондет, урем дене шыргыжал ошкылат. Тау, тыланда, яллан пайрем тӱсым пуртымыланда! Ӱткӱстыштӧ илыше-влаклан пашаштышт уҥымашым, тазалыкым тыланен кодам.