Каналташ жапым муыт

Кова-влак пелен кидпашам намиеныт, чайым йӱаш тамле кочкышым кӱэштыныт ыле. Тыге пырля чесле ӱстелым ямдылышна. Ӱстел коклаште мутланен, воштылын, ялысе калыкын илышыж гыч оҥай томаша-влакым ушештарен шинчышна. Кова-влак ончыч ӱдыр-влакым кузе марлан ужатыме нерген каласкалышт. Гармоньчо Б. Ибаевын ямле семым шокталтымыж почеш марла муро-влакым йоҥгалтарышна. Вашлиймаште ялысе ургызо Т. Данилова марла тувырым ургымо мастарлыкше нерген каласкалыш. Тувырысо марий тӱр-влакым ончыктыльо. Йоча-влак тӱрлымыжым куанен эскерышт. Тамара кокана кумылан-влакым ургаш да тӱрлаш туныкташ сӧрыш. Тудо шкаланже марла тувырым йоча улмыж годымак урген чиен. Тулеч вара мотор марла тувыр-влакым ургаш шонымаш эре ушыштыжо пӧрдын. Тыге 2000-ше ийлаште кумылжым шуктен - тувырым ургаш тӱҥалын да тачысе кече мартеат урга.

Тамара Яндугановна - чолга мер пашаеҥ. 2008-ше ийыште Йошкар-Олашке марий калыкын VIII съездышкыже миен ыле. Тиде ӱдырамашым чӱчкыдынак тӱрлӧ пайремыш, мероприятийыш ӱжыт. Нине выставкылаште Тамара Яндугановна калыклан сӧрал тувыржо-влакым уло кумылын ончыкта. Тудо Келтейысе веле огыл, воктен верланыше ялласе, тыгак республикын олалаштыже илыше марий ӱдырамаш-влаклан калык вургемым урген чикта. Тидлан ме тудлан уло чон дене таум ойлена.