Шергылтеш ялыштем ныжыл муро

Мурызо ӱдырамашна-влакат улыт. «Ший памаш» ансамбльым кӧ ок пале? Нунын йӱкышт пайрем годым ял, район да республика кӱкшытыштӧ йоҥга. Арам огыл ансамбль «калык» лӱмым нумалеш.

Конкурс кечын ялысе клубышто калык тич погыныш. Изижге-кугужге йӧратыме муро-влакым колышташ да мураш ямдылалтыч. Чапле клубыштына пеш каньыле: тыште шокшо, волгыдо, кумда сцена, ончен шинчаш пушкыдо вер улыт. Чыла тиде - ялсоветын надырже. Ялысе тошто клуб таче мотор, кызытсе жаплан келшыше тӱвыра полатыш савырнен.

Сценыш мотор марий тувыран ӱдыр-влак лектыч. Музиканче Ю. Иликаев ныжылге семым шокталтымеке, ӱдыр-влак яндар йӱкышт дене марла мурым шергылтарышт. С. Шамаева, А. Павлова, Э. Васингина, Э. Захарова мурымаште веле огыл, тунеммаште да спортыштат ончылно улыт. Изирак ӱдыр-влакат почешышт вараш ышт код. К. Михайлова, С. Шамаева, З. Захарова пайрем годым эре у муро дене куандарат. Тиде ганат нуно да йолташ ӱдырышт школ илыш нерген муралтышт. Ялысе гитаристна-влак денат кугешнен кертына. В. Иргубаев ден Т. Михайлов, шкеак шоктен-мурен, сылне мурым пӧлеклышт. Гитар дене нуно изиракышт годымак школышто шокташ тунем шуыныт.

Шкетын мурышо-влак кокла гыч О. Иргубаевам, Р. Нямиковым, Э. Иргубаевам, С. Михайловам, С. Яншаевам, Л. Игнашевам, С. Шамаевам, Э. Захаровам, А. Изиляевам куанен колыштна. Пошкудо Корак ял гыч толшо уна-влакат мурыштым шергылтарышт. Тыге кугарня касым икте-весынам куандарен эртарышна.