Пошкудо ден пошкудо келшен илышт

Акпарс, Усола, Шалтык ялласе клуб пашаеҥ-влак поян концерт программым ямдыленыт. Пайремыш пошкудо ялла гыч толшо-влакат лийыныт.

Кажне гана вучымо уна-влак - «Ош пеледыш» ансамбль, вокальный дуэт, Л. Шамыкаева ден Л. Ташмурзина погынышо-влаклан марла муро-влакым пӧлеклышт. Шалтык гыч Л. Миннуллина весела татарла, библиотекарь А. Шуматов, гитар дене шоктен, рушла муро-влакым йоҥгалтарышт.

Тыштак ял калык землячкына Н.М. Давлетовам Москваште лийше «Шӧртньӧ шыже - 2019» Российысе агропромышленный выставке гыч шӧртньӧ медаль дене пӧртылмыж дене саламлыш.

Пайремна пеш веселан эртыш, кумылна нӧлталте. Кас мучко марла, рушла, татарла мурышна да куштышна. Мучашлан Надежда Мурзагареевна тыгерак иктешлыш: «Тыге, ваш-ваш келшен, икте-весын пайремышкыже коштын, пырля пашам ыштен, шочмо кундемнам тÿзатена. Илышна умбакыжат воранен толжо манын, вуй ÿмбалнына тынысле кава лийже, пошкудо ден пошкудо келшен илышт. Кажне еҥлан пиалым, тазалыкым, чон ласкалыкым тыланем».