Вучыдымо вашлиймаш

Тыгодым кодшо курымын йӧсӧ 90-ше ийлажымат шарналтем. Шошо велеш фуражем пытен кайышат, тулеш тошкалше гай лийым. Кушко миен пернашат, кӧлан вуйым савашат ӧрым. «Краснополянский» совхозыш йыҥгыртышым. Пиалешем, директоржым кычал муым. Т.С. Латыпов ожсо палымем гына огыл, пеш сай да ӱшанле йолташем улеш манам гынат, ом йоҥылышо. Тудлан могай азапыш логалмем нерген ойлен пуышым. «От ӧркане гын, эрла эр толын шу, полшем. Пеленет мешакымат нал», - манят, телефон трупкам пыштыш.

Эрлашыжым мый, кумыл нӧлтын, куанен, районын витле километр тораште верланыше вес лукышкыжо лектын кайышым. Тимофей Сатлыкович мыйым порын вашлие. Рушарня кече ыле гынат, содор гына бухгалтер-кассирым мӧҥгышкыжӧ миен налын тольо. Вашке гына оксам тӱлышымат, фуражлан да транспортлан кӱлеш кагаз-влакым кидышкем кучыктышт. Тимофей Сатлыкович чеверласышыла пелештыш: «Только фураж налаш Сокто селасе шурнывечыш кайыман лиеш».

Сокто склад вуйлык Асылян Токбулатов ден полышкалыше рвезе вашке гына пырчым йоҥыштенат нальыч. Паша коклаште шке семынышт мутланымышт пылышлан солныш. «Тиде пӧръеҥым ала-кушто ужмыла чучеш, но нигузе шарналтен ом керт», - пелештыш илалшыракше. «Тиде пӧръеҥ, Асылян изай, Шаран марий-влакын юмышт улеш», - трук вашештыш рвезыракше. «Вот вет! Кузе тиде рвезын вуйышкыжо тыгай шонымаш толын пурыш?» - шоналтышым мый.

Соктыш фуражлан миен коштмем деч вара иктаж кумло ий чоло эртыш «Кӧ лийын тудо рвезе? Тунам лӱмжым йодашат шотем ситен огылыс», - чӱчкыдын шонем ыле. Кодший У ий деч ончыч Шаран эмлымверыште изиш «ачалалт» лекташ логале. Палатыште кок татар, ныл марий эмлалт кийышна. Иктыже Сокто села гыч ыле. «А мый тендам пеш сай шарнем. Ожно тыланда пырчым йоҥыштен пуэнна ыле, - каласыш тудо. - Асылян изай дене пошкудо семын илена». Тудо мыйым ожно юмылан шотлышо Геннадий Минлигареевич Сыртланов, ынде 55 ияш пӧръеҥ, лийын улмаш.