Пӱнчер ял эн мотор-влак коклаш логалнеже

10 сентябрьыште комиссий конкурсын икымше йыжыҥжым иктешлен. Финалыш лу ял ден села логалыныт. Тиде Учале районысо Наурузово, Ишимбай районысо Макарово, Стерлитамак районысо Талачево, Стерлибаш районысо Янгурча, Шаран районысо Дӧртыльӧ, Салават районысо Алькино села, Кугарче районысо Таваканово, Караидель районысо Явгильдино, Мишкан районысо Пӱнчер, Уфимский районысо Лекаревка ял-влак.

Фото: vk.com/pyncher_yal

Комиссий нунын тӱжвал сыныштым, еҥ-влакын илыме верым ямландараш кузе тыршымыштым, калык йӱлам арален кодымыштым, шке селаштым турист-влаклан оҥайрак ышташ тыршымыштым аклен. А ынде финалыш лекше-влак нерген «БСТ» телеканалыште презентацийым ончыктат да нунын верч йӱклымым шотлат.

Каласыман, кодший ты конкурсышто Бирск районысо Кужнур марий яллан кокымшо верым пуэныт ыле. Тунам тудын верч эн шуко еҥ йӱклен.