Жап эртыме семын шарнымашат шергырак

К. С. Харитонова (Пашаева) 1934 ийыште Йывангасола ялыште илыше кресаньык ешеш шочын. Аваж ден ачаже колхоз пашаште тыршеныт. Сар тӱҥалмеке, ачаже сар корным тошкен. 1945 ийыште, сусырген, мӧҥгӧ пӧртылын. Районын финанс пӧлкашкыже инспекторлан пашаш пурен, латкум ий Йывангасолаште ялсовет председательын сомылжым шуктен.

Пашаевмыт ешыште ныл йоча шочын. Эн изиже, Клавдия, изиж годымак чолгалык дене ойыртемалтын. Йывангасола, Музек, Николо-Березовка селасе, Янаул районысо Тумна школлаште тунемын. Клавдия тунеммаште чолга, ушан, эре уым пален налаш тыршыше лийын. 10-шо класс деч вара Сарапул олаште электрогенератор заводышто пультистлан ыштен. Тиде жапыштак индеш тылзаш курсышто медшӱжарлан тунемын.

Кеҥежлан ялыш канаш толмо годым Клавдия Йыван лӱман рвезе дене палыме лийын. 1960 ийыште нуно ешым, чумыреныт да Йывангасолаште илаш тӱҥалыныт. Вич ий Клавдия Сергеевна шочмо ялыштыже медшӱжарлан ыштен. Пермысола да Ведрес калыкын тазалыкыштлан вуйын шоген. Ныл ий ялсовет председательлан, латик ий ял библиотекыште, сулен налме канышыш лекмеш, ялсовет секретарьлан ыштен, икмыняр гана ялсовет депутатлан сайлалтын. Тыршен пашам ыштымыжлан тудым шуко гана Моктымо кагаз дене палемденыт.

Иван Степанович пелашыж дене пырля кум йочам ончен куштеныт. Икшыве-влак ешышт дене тӱрлӧ вере илат. Клавдия Сергеевна кызыт эн изи Сергей эргыжын ешыж дене ила. Ковам вич уныка да кок кугезе уныка куандарат. Таче тудо сулен налме канышыште улеш. Туге гынат кызытат шочмо ялже верч чонжо йӱла.

Тений 22 ноябрьыште Клавдия Сергеевна 85 ияш чапле юбилейжым палемда. Тек тудым тазалык куандара, а ӱмыржӧ кужу лиеш.