«Тау мутым пӧлеклем тыланет, шочмо ял!»

Ялыште кугу пайрем эртаралтме нерген урем мучаштак пален налаш лийын. Йырымваш мурсем йоҥген. Чевер пеледышан тувырым чийыше вате-влак, пайрем кочкышым нумалын, йоча-шамыч, ваш-ваш ӱчашен, пайрем эртарыме верыш погыненыт. «Ош пеледыш» ансамбльын йоҥгалтарыме мурыжо пайрем тӱҥалме нерген увертарен. Вара вӱдышӧ-влак сценыш Акпарс сельский поселенийын вуйлыкшо Р.Г. Ягудиным ӱжыныт. Тудо ял калыклан пайремым ямдылымылан, уна-шамычын толмыштлан тауштен, шукыштлан Чап грамотым да таумутан серышым кучыктен. Кугу ийготан еҥ-влакымат, шукерте огыл шочшо икшыве-влакымат, ава лияш ямдылалтше еҥ-влакымат саламлаш монден огытыл.

«Тыгай пайремыш калыкым тений икымше гана погенна. Ялыштына у пӧрт-влак чоҥалтыт, йоча-влак шочыт. Ялна эркын ылыжеш, у тӱсым налеш. Вич ий гыч 100 ияш юбилей лийшаш, тудыжым эше кумданрак эртараш шонена. Верысе калык пелен уна-влакат ятырак толыныт. Ӱстел сий поян, мурымаш-куштымаш лыҥак лийшаш, - каласыш пайрем тӱҥалтыште тудын ик тӱҥ организаторжо Лариса Иркина. - Пайремым эртарышаш верыште пеш чот тыршышна, сценым ыштышна, шуко молымат шотыш кондаш перныш. Спонсор-влак кокла гыч верысе предприниматель Н.М. Давлетова шуко полшыш, уна-влакым сийлаш шке кочкыш-йӱыш сатужым пуыш». Тудо шке выступленийыштыже участник-влаклан да родо-тукымжо ден пошкудыжо-шамычлан таум каласыш, вет иктышт тора корным такыртеныт гын, весышт уна-шамычым вашлияш ямдылалтыныт.

Организатор-влак Лариса ден Раиса Иркинамытын мутышт почеш, пайремым эртараш Анатолий ден Игорь Ишкулаевмыт, Владимир Андреев, Тимиргалей Сафаров, Константин ден Юрий Ахметзяновмыт, Игорь Лумпов, Геннадий Шаяхметов, Светлана ден Алексей Шуматбаевмыт, Никита Дементьев, Илья Минлишев, Эдуард Сатлыков, Виктория ден Валентин Минлигалинмыт да нунын икшывышт чот полшеныт. Уста вӱдышӧ-влак Екатерина Иркина ден Олеся Сафаровамат ойырен палемдыман.