Нерге ялыште - кум шӧртньӧ сӱан

1969 ийыште кум мужыр ешым чумырен. Тиде Васильевмыт, Ишпахтинмыт, Яникеевмыт еш-влак. Нуно икте-весыштым ончычсо гаяк йӧратен, пагален, арален илат, вет йӧратымаш чыла нелылыкым сеҥаш полша.

Ялсовет вуйлатыше В.Е. Захаров нине еш-влаклан поро тыланымашым каласыш да республика лӱм дене колтымо пӧлекым кучыктыш. Мишкан районысо Ветеран совет вуйлатыше Ю.Г. Балахнина тауштымо серышым колтен. Нерге ялысе ветеран-влак лӱм дене меат нуным шокшын саламлышна.

Любовь Шакмаевна Нерге ялеш шочын-кушкын. Школ деч вара шочмо ялыштыжак библиотекарьлан ышташ тӱҥалын да, пенсийыш лекмеш, паша вержым вашталтен огыл. Шке жапыштыже Уфасе библиотечный техникумым тунем лектын.

1968 ийыште Яков Александрович дене палыме лийыныт да икымше гана ужмаштак икте-весыштым йӧратен шынденыт. Яков Пекшек ял гыч улеш. Кандашымше класс деч вара Бирск оласе 26-шо СПТУ-што механизаторлан тунем лектын. «За коммунизм» колхозышто шоферлан, трактористлан, кеҥежым комбайнерлан тыршен. Пенсийыш лекме деч ончыч ик жап апшатчылан ыштен.

Яникеевмыт ныл икшывым ончен куштеныт. Лиана ӱдырышт аваж семынак библиотекыште ышта. Эдик, Алеша, Андрей вахта йӧн дене ӧрдыж кундемлаш пашаш коштыт. Коча-ковам кандаш уныка да ныл кугезе уныка куандарат.

Данил Иванович Нерге ялеш шочын-кушкын. Совет Армий радамыште Нижний Тагил олаште служитлен. Увольненийыш колтымо годым олам ончен коштын, кинош миен. Икана трамвай дене кайымыж годым салтак мотор ӱдырым ужылалтен да, воктекыже шинчын, тудлан рушла, татарла, марла йодыш-влакым пуэден. Коктынат марий улмыштым пален налмек, марла кутыраш тӱҥалыныт.

Рая Янаул район Тошто Орья ял гыч улмаш. Тудо маляр-штукатурлан тунемын.

Тыге нуно 1967 ийыште келшаш тӱҥалыныт. Вес ийжылан, служба мучашке лишеммек, рвезе мӧҥгыжӧ пӧртылын, вара Нижний Тагилыш Раям налаш миен. Ӱдырым ялыш конден. Сӱаным ыштеныт, 1969 ийыште возалтыныт.

Данил Иванович школышто военруклан, трудовиклан ыштен, колхозыштат тыршен. Раиса Петровна колхозышто тӱрлӧ пашаш коштын.

Нуно шым икшывым ончен куштеныт. Кажныже шкенжын сайлен налме профессий дене пашам ышта. Ирина, Нина, Алена, Славик, Валя, Владик, Дима чылан ешан улыт. Кум эргышт ялешак у пӧртым нӧлтеныт. Коча-ковам 15 уныка куандара.

Геннадий Васильевич Пекшек ялеш шочын-кушкын. Бирск СПТУ-што механизаторлан тунем лектын. Ачаже сареш колен. Ешлан шуко йӧсым ужаш логалын, но эрге-влак аваштлан кугу эҥертыш лийыныт, эре полшеныт.

Рвезе, Кронштадтыште Совет Армий радамыште служитлен толмек, колхозышто трактористлан ышташ тӱҥалын. Икана Нерге ялысе «Чайный» ончылно шогымыж годым урем дене вӱдлан ошкылшо мотор ӱдырым ужын да почешыже ончен кодын. Вара тиде ӱдыр дене вашлияш амал лектынак шоген. Вес гана трактор дене вакшыш шурным йоҥышташ шупшыктен, а ӱдыр тушко ломбыгичкым йоҥышташ миен улмаш. Тунам рвезе тудын деч кӧн ӱдыржӧ улмым йодын, а тудыжо пошкудыжак улмаш.

Анисия школ деч вара ик идалык фермыште ушкалым лӱштен, вара «Чайныйыш» поварлан ӱжыныт. Тудым Октябрьский олаш поварлан, а Геннадийым Белебей олаш механиклан тунемаш колтеныт. Нине ола-влак лишне верланеныт. Тыге нуно икте-весе деке унала кошташ, келшаш тӱҥалыныт. Тунем толмекышт мужыраҥыныт.

Геннадий Васильевич шуко ий колхозышто механиклан да ялсовет председательлан ыштен. Тиде паша гычак пенсийыш каен. А Анисия, «Чайный» петыралтмек, Пекшек тӱҥалтыш школышто техничкылан ыштен.

Васильевмыт ныл икшывым ончен куштеныт. Марина, Олег, Сергей, Ирина тӱрлӧ вере пашам ыштат. Коча-кувавам лу уныка да кок кугезе уныка куандарат.

Пагалыме юбиляр-влак, шӧртньӧ сӱанда дене шокшын саламлена. Таза, кужу ӱмыран лийза, мужыр дене вычыл-вычыл илыза.