«Уремна кушкеш, тӱзлана. Тыште илыш шолеш…»

Уремын лӱмгечыжым палемдаш кызыт тушто илыше еҥ-влак гына огыл, ожно тиде уремыште илыше, озанлыкыште тӱрлӧ пашаште тыршыше, вара тӱрлӧ амал дене вес вере куснен кайыше, но садак ожсо пагытыштым шарныше еҥ-влакат толыныт ыле. Еҥ-влак икте-весе дене саламлалтын, ӧндалалтын, самырык годсо пошкудыштым, йолташыштым, палымыштым ужын куаненыт. Пошкудо ялла гыч толшо-влакат, мӱндыр уна-влакат ятырын лийыныт.

Эн ончычак почётан уналан, «Акбарисовский» совхозын икымше директоржо Д.Д. Шуматбаевлан саламлыме мутым ойлаш ӱшанышт. Тудо совхозын у озанлык семын шочмо да икымше тошкалтышым ыштыме жапше нерген кӱчыкын каласкален пуыш. Калыкым Акпарс сельский поселенийын вуйлыкшо Р.Г. Ягудин, район администраций гыс ЧС пӧлкан вуйлатышыже В.В. Галеев, паша ветеран-влак кокла гыч 25 ий ялсоветым вуйлатыше Р.Д. Ахметшина, райрӱдыштӧ электроэнергетический службым вуйлатыше В.М. Кунаккузин, районысо «Марий вий» мер организацийын почетан председательже А.А. Асмаев да молат саламлышт. Пайремым туныктымо пашан ветеранже Л.Д. Курмакаева да верысе школын туныктышыжо Е.Д. Курмакаева пеш сайын намийышт. Сценыште «Шалтык сем» да «Ош пеледыш» ансамбль-влак, У да Тошто Тумбагуш, Куртетал ялла, Калтаса район Агытан ял гыч толшо «Марий кумыл» ансамбль-влак выступатлышт. Погынышо калык кажне номерым шокшо кидсовыш дене вашлие.

Жапыштыже озанлыкын лӱмжым чапландареныт тиде уремыште илыше механизатор-влак Ф. Абдуллин, И. Рахимов, Б. Шуматов, М. Гибадуллин, А. Атнагулов, шофер А. Урсаев, йочасад вуйлатыше Г. Шамигулова да молат. Кызыт ӱмырыштым ласкан шуят ончычсо вольык ончышо-влак Гульяна ден Бикъян Исламовмыт, «Башкортостанысе ял озанлыкын сулло пашаеҥже» лӱмым нумалше доярке Зоя ден скотник Ахмат Минлибаевмыт, ончыл доярке-влак Р. Ташмурзина да З. Атнагулова, совхозын прорабше А. Мустаев, мӱкшызӧ В. Ахметшин, йочасадын воспитательже Л. Шуматова, лӱмлӧ сӱретче, Москваште «Поле чудес» передачыште автомобильым модын налше В. Ташмурзин, Чечняште геройла колышо Ю. Абдреевын аваже Меҥайбика Гареевна да молат. Ожно тиде уремын кушмыжым, илен-толын моторланымыжымат шарнем. Кызыт тысе калык, саманым шотыш налын, шке вийжылан эҥертен ила. Кажне сурт поян сад-пакча дене ойыртемалтеш. Еҥ-влак шуко вольыкым, сурткайыкым, кроликым, мӱкшым ашнат. Сурт поянлыкыштын ужашыжым ужален, ешлан кӱлеш шийвундыш савырен моштат. Урем пайремын тӱҥ организаторжо семын тиде уремыште илыше ончычсо школ директор, ындыже сулен налме канышыште улшо ялсовет депутат Г.Е. Ахметшинам шотлыман. Пелашыже Владимир Бикъянович дене 35 ий пырля илат. «Уремна кушкеш, тӱзлана. Тыште илыш шолеш, ончыко шуйна, икшыве-влак шочыт. Тиде мемнам куандара. Мый уремыштына илыше калыкем дене кугешнем, чылаштланат таум ойлем, тазалыкым да кужу ӱмырым тыланем. Пайремлан ямдылалтме годым ик омарташте илыше мӱкшла, ик еш семын тыршышна», - манеш Галина Емельяновна.