40 ий чонеш витара

Пареҥге лекмек, калык ялт ӧрӧ: тудым ала-могай «йоҥылыш матрос-шамыч» кочкыт. Могай копшаҥге, кузе тудын дене кучедалаш, нигӧ пален огыл. Вашке гыч манеш-манеш дене умылышна: Колорад гыч толшо «уна» улмаш. Но кузе пареҥгым арален кодаш, вет шудыжо кечын иземеш? Калык копшаҥгым поген пуштедаш тӱҥале. Южышт шыдышт дене пареҥге вондым лупшенат ончышт, но пайда ыш лий.

Мемнан «Алга» колхозна, калыкым поген, дустым шалатыш да кузе шаваш туныктыш. Тиде пеш кугу полыш лие… Пошкудо Ушмен ялысе «Победа» колхоз калыкым пасуш копшаҥгым погаш лекташ ӱжын. Кажне копшаҥгым ончыч 2 ыр, вара 1 ыр дене «акленыт». Мыйын ватем, Ушмен ял ӱдыр Руфина Ванюковна, тыге шарналта: «Колхозын пареҥге пасужо кызытсе Коян селан ер велныже верланен ыле. Мыят школ деч вара копшаҥгым погаш коштынам. Вара, колхоз правленийыш намиен, учетчиклан шотлыктенна. Кеҥеж мучко колорад копшаҥгым поген, мый шканем туфльым нальым…»

«Чолман» газетыш возгален шогышо Юрий Атыев тунам промыселыште операторлан ышта ыле. Паша верже Ош Виче воктенрак лийын. Тиде пашаче пӧръеҥ яра шинчаш ок йӧрате. Шкенжын паша верже воктене, кечывал каныш жапыште электромеҥге-влак воктенсе мландым кӱнчен, пареҥгым шынден. Икана мый туддеч йодым:

- Юрик чӱчий, пареҥгетым саде копшаҥге ок коч, наверне, - чыла могырымат шыдаҥ, уржа але шож кушкытыс…

- Шольым, - малдале тудо, - нер ӱпшышт пеш виян, садак муыт. Кеч-куш шындет гынат, чоҥештен толыт.

…Тудо жапыште школышто тунемше ӱдыр-рвезе-влак ынде пенсийыш лектыныт але лекташ погынат. Пеш жал, Пенсионный фонд тидым ок акле. Колорад копшаҥгым погымат, 6, 7 да 9 классым тунем лекше-влакын ушменым ончен кугемдымыштат, кеҥеж мучко колхозлан шудым ыштымат, кажне шыжым колхоз пареҥгым лукмат пенсий стажыш ок пуро манын ойлат.