Тулыкеш кодшо школ

Мемнан школнат тулыкеш кодшыла коеш. Шукерте огыл тыште икшыве-влакым туныктеныт. Шочмо йылмынам, тӱвыранам, йӱланам арален кодымашке, вияҥдымашке кугу надырым пыштеныт. Ялыште илыш умбакыже шуйнымо, мотор деч мотор пӧртым нӧлтымӧ годым тӱҥалтыш школым петырат манын, кӧ шонен? Кызытат школ пакчаште кажне ийын сирень, олмапу пеледыт. Сар шӱшпык, толын шинчын, сылне мурыж дене яндар южым шелыштеш. Пеледыш гыч пеледышыш чоҥештылын, изи мӱкш-влак ызгат. Но школ кудывечыште йоча-влакын веселан чогыматымышт ок шокто.

Тиде школыштак верысе поэтна М.Н. Мишенькин тунемын. Тудым марий калык поэт семын шагал пала, молан манаш гын шонымыж семын почеламут сборникшым луктын ыш керт. Ӱмыржӧ кӱчык лие. Но, каласаш кӱлеш, сборникым лукташ ситыше оксам поген шуктен улмаш. Адакшым, чын поэт улмаш сборникым лукмо деч ок шого.

Ял-влак изи але кугу лийышт, нуно школ улмылан кӧра мотор улыт. Пытартыш жапыште яллаште черкым, мечетьым чоҥаш тӱҥальыч. Нуным шӧртньӧ дене нӧлтен шындат гынат, садак ялыште тӱҥ верым школ айла. Ончалза фотоснимкыш. Кузе тунемше-влак туныктышышт Галина Ильиничнан Искуш тӱҥалтыш школышто те пытартыш тунемше лийын кодыда манмыжлан ӧрын шогат. Икымше радамыште шола гыч пурлашке К. Масаев, Л. Изибаев, Д. Ильтубаев, Э. Алетдинова, Д. Масаева, Д. Изибаев, кокымшо радамыште Л. Егорова, К. Тимирбаева да туныктышо Г.И. Галеева шогат (снимкыште).

Нуно школын историйышкыже пурен кодыныт. Тунемме жапыштышт Искуш ялыште школым йӧршын петыреныт. Ончыкыжо Маядык школыш кошташ тӱҥалыныт. Кумда да кугу корныш лектын, марий калыкын чапшым нӧлтыза!