Еш - айдемын тӱҥ поянлыкше

Акпарс школышто Ешын кечыжлан пӧлеклыме «Салтак лияш - Шочмо эллан служитлаш!» вашлиймаш эртыш. Пайремыш военный академийлаште тунемше але срочный службым эртыше рвезе-влакын ава-ачаштым - Курмакаевмытым, Саитовмытым, Тухватовмытым, Николаевмытым, Ахметшинмытым, Якуповмытым, Атнабаевмытым, Казимовмытым, Ташмурзинмытым, Габдрахмановмытым - ӱжмӧ ыле. Чечен сарыште лийше самырык талешкын аваже М.Г. Абдреева - пайремыште ий еда вучымо уна. Вашлиймашке тыгак пагалыме уна, индивидуальный предприниматель Н.М. Давлетова толын ыле.

Акпарс ялсоветын паша управляющийже Г.Р. Ринатова ялсоветын мер илышышкыже чолган ушнымыштлан, икшыве-влакым кӱлеш семын ончен куштымыштлан еш-влаклан Тауштыме серышым кучыктыш. Пайремыш ӱжмӧ ава-ача-влак лӱм дене вашлиймашым ямдылыше-влакым Л.Д. Курмакаева тауштыш. «Икшывына-влак нерген шуко уым палышна. Службым эртыме верлаштышт командований эргына-влакым пример семын ончыкта. Шочмо Эл ончылно порысым шуктымаште сай лектышыш шумыштлан эргына-влакым Чап грамот дене палемдыме. Ме нунын дене кугешнена!» - палемдыш офицерын аваже. Пайремыш мийыше Эдылбика Султангареева кокай тыгерак иктешлыш: «Элыште илыш эмен лийже, пасушто ӱдымӧ шурно умыжо, армийыш кайыше рвезе-влак таза-эсен пӧртылышт».

Пайрем концертым Акпарс школын тӱҥалтыш класслаште тунемше ӱдыр-рвезе, «Ош пеледыш» фольклор ансамбль сӧрастарышт. Чай да тутло когыльо деч посна могай пайрем? Столовыйышто уна-влак, сийым погымо ӱстел йыр верланен, икте-весе дене ласкан мутланен, ятыр жап каналтен шинчышт. Тиде кечын нигӧ мӧҥгӧ шаланаш ыш вашке…