Калмиямучашыште стелым почыч

8 майыште Калмиямучаш ялыште кок ий ончыч тарватыме пашам мучашлышт - стелым почыч. Ял калыкын куанжым пайлаш ятыр уна толын ыле: БР Кугыжаныш Собранийын - Курултайын депутатше Б.Г. Юмадилов, Калтаса район вуйлык Ю.М. Садыров, райсовет депутат П.Т. Петров, Калмиямучаш ялсовет вуйлатыше В.В. Маязов, районысо историй да краеведений тоштерын директоржо Р.Ш. Шакиртов да молат. Пайремым йоча-влак, К. Ибатова, Н. Сайфутдинов, Л. Михайлова, мурышо ӱдырамаш ансамбль сӧрастарышт.

Стелым чоҥаш ныл шӱдӧ тӱжем теҥге оксам кучылтмо. Шӱдӧ тӱжемжым калык деч погеныт гын, кум шӱдӧ тӱжемжым районысо «Реальные дела» программа почеш ойыреныт. Стелым почаш Кугу Ачамланде сарын икшывыжлан - Алтынчась Ислибаевалан - ӱшанышт.

Стелеш 73 еҥын ачалӱмжым возымо. Тушеч 44 еҥже сареш вуйжым йомдарен, 29 фронтовик мӧҥгӧ пӧртылын. Стелым йыр печылыме. Воктенже шинчын каналташ, ветеран-влакым шарналташ кок теҥгылым йӧнештарыме. Йырысе вер-шӧр эре тӱзатыме лиеш, пеледыш-влак шинчам куандараш тӱҥалыт манын, ӱшаныме шуэш.

Васола ял калык тений кокымшо гана «Курымашлык полк» акцийыш ушныш. Кодшийсе семынак, тудо ялын ӱлыл мучашыж гыч тӱҥале. Тӱшка дене эртыше калык, кӱшыл мучаш уремыш миен толын, клуб воктене погыныш. Полк семын ошкылшо-влакым военный муро почеш машина ужатыш. Митингым почмо деч вара ойлаш кумылан-влаклан мутым пуыч.

Васолаштат шарнымаш кӱ тымарте уке ыле, но кандашымше май кастене ялыш кӱртньӧ гыч ыштыме стелым конден шогалтышт. Пашам 15 июнь марте мучашлаш шонат.