Шочмо йылмым мондыман огыл

Ялысе илалшырак ӱдырамаш-влак, кидпашаштым кучен, палемдыме жаплан Йывангасола клубыш вашкышт, вет марий калык ожнысек кидпашалан шӱман лийын. Кечыгут пашаште тыршен гынат, кастене, нойымым шижде, межым шерын, шӱдырен, пидын. Тыгай пашам шуктышым кызыт шагал ужат. Л. Валишина шке куымо паласшым, паласым куымо станокшым конден ыле. Кажне тунемше, станок пелен шогалын, паласым куэн ончыш. Эсогыл рвезе-влакат - Е. Митрофанов, М. Иванов да молат - тиде пашалан кумылаҥыч. Мастар-влак Г. Уварова ден М. Тимиршина межым шӱдырымӧ сомылын ойыртемже дене палдарышт. Ӱдыр-влак А. Сюткина, В. Кугубаева, Я. Валикаева куанен ончен шогышт да, кӱнчыла тоям кучен, межым шӱдырен ончышт. А. Прокопьева мундырам почкынчаш туныктыш. Кидпаша мастар Н. Михайлова ятыр кидпашажым: мотор деч мотор меж носким, пижым, пӱкенеш пыштыме паласым - конден ыле. Тудо паласым пидаш шӱртым кузе ямдылыме, кузе тӱҥалме нерген ончышо-влаклан радам дене умылтарыш. Тунемше-влак кажне пашам куанен ончышт.