У ий - сылне да оҥай пайрем! Ялысе активист-влак дене ончылгоч погынен, Тошто У ийым вашлияш каҥашышна. Эше лотерей билетым ужалышна, 100 билетым ик арня коклаште налын пытарышт, шукыжлан ышат сите. Тӱҥ призлан тортым ямдылышна.
"Шаран районысо Акпарс ялыште Тошто У ийым пайремленыт"
Пайрем 14 январьыште ялын эн кужу уремыштыже, «ДЮНА» кевыт воктене, эртыш, кас марте ямле сем йоҥгыш. Уремыште ныл кужу ӱстелым шындышна, ныл самоварыште чай чыжлен-гӱжлен шолын шинчыш. Ӱстел сийым: мелнам, палышым, когыльым, кыстыбыйым, чак-чакым да молымат - ял калык кӱэшт кондыш. Палемдыме жаплан шуко еҥ погыныш. Коклаште Биктыш, Усола, пошкудо Шалтык татар ялла гычат ончаш толшо-влак ыльыч, а Уял ӱдырамаш-влак мотор марий тувырышт дене ойыртемалтыч.
Йӱштӧ Кугыза ден Лумӱдырын рольыштым Артур Шаймухаметов да Надежда Курмакаева оҥайын модын ончыктышт. Калыкым У ий пайрем дене саламлаш Акпарс ял шотан илем вуйлатыше Р.Г. Ягудин толын ыле. Предприниматель
Н.М. Давлетоват ик пайремышкат толде ок код, тиде ганат шуко пӧлекым кондыш. Калыкым ялысе депутат-влакат саламлышт.
Йоча-влакат, кугыеҥ-влакат пайрем кечын пӧлекым вучат. Ӱдыр-рвезе-влак мурышт-куштышт, почеламутым каласкалышт, конкурслаште вийыштым тергышт, юарлен модыч, чолгалык, мастарлык дене ойыртемалтше-влакым пӧлек дене куандарышт. Ача-ава, коча-кова-влак, шке йочаштым, уныкаштым ончен, самырык пагытыштым шарналтен, совыштым куанен пералтышт, южышт пырля кушталташат лектыч.
А могай пайрем гармонь деч посна? Гармоньчо-влак Радик Шангареев да Сергей Имангулов икте-весыштым вашталтен-вашталтен шоктышт. Тӱрлӧ такмакым марла-татарла мурышна, пӱжалтмешке куштышна. Йӱштӧ иктымат ыш лӱдыктӧ. Мурымо-куштымо деч вара чылан ямдылыме сий дене шокшо чайым подылаш вашкышт.
Увертарыме огыл ыле гынат, пайремыш толшо-влак костюмымат ямдыленыт. Светлана Исламован, Людмила Якупован, 73 ияш Гулшикар Мадиярован костюмыштым эн сайлан шотлымо. Надежда Мурзагареевна шке лӱмжӧ дене Йӱштӧ Кугыза ден Лумӱдырлан, вӱдышӧ, гармоньчо, эн сай костюмым чийыше-влаклан пӧлекым кучыктыш.
Тошто У ий касым эртараш Н.М. Давлетова, «ДЮНА» магазинын пашаеҥже-влак Любовь Мухаметзянова, Ольга Гибадуллина, Олеся Шуматова пеш чот полшышт, нунылан пеш кугу таум каласыме шуэш. Эре тыгай чулым, таза да ешыштышт пиалан лийышт.
Кастене Шорыкйолым пайремлышна. Самырык-влак Васлий Кугыза да Куваже лийын чийышт, сурт еда коштыч. Оза-влаклан тазалыкым-эсенлыкым тыланышт, марла сем почеш тыгерак муралтен кушталтышт:
Икманаш, чылажымат шуктен ыштен шогет гын, марий йӱланат, койыш-шоктышнат, калыкнат таза-эсен лийыт да илаш тӱҥалыт. Чылажат шкенан деч шога.