Ава ыштен, ава куштен…

Тиде шонымашым илышыш шыҥдараш М.Р. Янышева (ялысе клуб вуйлатыше) да Л.И. Сайсанова (хормейстер) чот тыршышт. СДК пеленсе «Ший памаш» калык, «Кӱдыроҥгыр» йоча ансамбль-влак да «Йоҥгалтыш» дуэтат шуко пӱжвӱдым йоктарышт. Пайремым Кирилл Исанбаев да Яна Алексеева мастарын вӱдышт, шке мутышт дене кажне аван шӱмыш шуаш тыршышт.

12 шагат эрталтымеке, тӱвыра пӧртыш илалше да самырыкрак ава-влак, иктын-иктын але икмынярын погынен, корным такыртышт. Мийыдежат ок лий, вет пайремже нунылан пӧлеклалтын. Тиде кечын «Материнская слава» медаль дене палемдыме шуко икшыван ава-влакым да ӱмыр пелашышт дене 15, 20 але шукырак ий пырля, ваш-ваш умылен, икте-весым йӧратен, ойго ден куаным лош пайлен илыше-влакым шокшын саламлышт. Юбиляр-влаклан пӧлекым кучыктышт да кужу ӱмырым, пиалым тыланышт.