Прокурор

Тунам рейс автобус Шараныш индеш шагат каслан гына толеш ыле. Райрӱдыш шумо деч ончыч корно йолташем, мыйым чаманен але вес амал дене, трук «Йӱд вашеш Усолашкыда огыда кай дыр. Пураш верда уке гын, мый денем мален лектыда» мане. «Мансаф Фазлыевич, кугу тау. Райрӱдыштӧ кок шӱжарем да шольым ешышт дене илат гынат, йӱдлан кодын тунемын омыл. Мыйым йӱд корно деч чот йӱштӧ юж да шинча почдымашлык поран гына чактарен кертыт. Коло уштышым куштылгын йолын эртем», - вашештышым тунам.

Усола клублан йожекрак Асылбай павай ила ыле. Пелашыже инсульт перымылан кӧра илыш дене чеверласыш. Икмыняр ий гыч ойган случай деч вара павайын ӱмыржат кенета кӱрылтӧ. Тиде случайым милиций пашаеҥ-влак текшырышт. Прокурор шкежат содор гына толын шуо. Мый школышто урок-влакым эртарен пытаренамат, мӧҥгӧ ошкылам ыле. Прокурорым вашлийымат, саламлалтна. «Мыланем ужшо-колшо-влакым йодыштман. Мыйым тысе калык ок пале. Те нунылан лишылрак улыда. Пагытда уло гын, пеленем кодыда ала? Тыге еҥ-влак дене мутланаш куштылгырак лиеш», - темлыш мыланем Сабуров. Келшаш логале.

Йодышт ситарымек, прокурор тыгерак каласыш: «Ӧрам веле, молан нуно уэш-пачаш «прокурор» мутым ойлыштыт?» «Мансаф Фазлыевич, павай, кӱлеш-ок кӱл ма, эре кушко-гынат нерым шӱшкеш ыле. Оккӱлжымат палаш тыршымыжлан ял калык тудлан «прокурор» лӱмедышым тушкалтен пуэн», - вашештышым мый. Район прокурор йӱкын воштыл колтыш.