Марий ял - эн мотор-влак коклаште

Кодшо кечылаште Уфаште «Башкортостан Республикын эн мотор селаже» конкурсым иктешленыт. Тудым тений «Башкортостан Республикын муниципальный образованийже-влакын Советышт» ассоциаций, Самырык депутат-влакын ассоциацийышт да «Башкортостан» ТРК ГУП эртарышт. Конкурсыш 47 села да ял ушнен. Икмыняр йыжыҥым вончен, финалист-влак коклаш марий-влак тӱшкан илыме илем-влакат логалыныт ыле. А шукерте огыл, йӱклымашым да жюрин ойжым аклен, сеҥыше-влакым ойыреныт.

«Башкортостан Республикын эн мотор селаже - 2018» конкурсышто икымше вер дене Абзелил районысо Халилово, кокымшо дене Бирск районысо Кужнур (Тудын верч эн шуко еҥ йӱклен), кумшо дене Татышле районысо Курдым села-влакым палемденыт.

Ял озанлык пашаеҥ-влакын кечышт вашеш М. Гафури лӱмеш драма театрыште эртарыме торжественный погынымаште республикын Премьер-министрже Рустэм Марданов сеҥыше-влакым саламлен да верлаште верысе инициативылан полышым пуымо программым илышыш кузе шыҥдарыме нерген йодышт налын. «Мыланна ойырымо 50 тӱжем теҥгем могай сомыллан кучылтшашым ялысе погынымаште каҥашена. Можыч, ялыш пурымаште стелым шогалтена», - ойла Кужнур ялсовет вуйлатыше Р.Т. Хасанов.

Э. АПТУЛМАНОВА.

Снимкыште: Р. Марданов Р. Хасановлан (шола гыч кокымшо) дипломым кучыкта.